Pynbna ka Meghalaya Cricket Association ïa ka thup kyrteng ki 15 ngut na bynta ka Syed Mushtaq Ali Trophy
Shillong, Nailur 26: Ka Meghalaya Cricket Association hynne ka Sngi ka la ïoh ban pynbna ïa ka thup kyrteng jong ki 15-ngut ki player na bynta ka lympung lehkai BCCI domestic T20 tournament ïa ki shynrang, kaba la tip da ka Syed Mushtaq Ali Trophy.
Kumba la paw, ka kynhun ïalehkai jong ka jylla Meghalaya ka don ha ka Group kaba jwat kiba kynthup ïa ka Hyderabad, Mumbai, Baroda, Haryana, Chhattisgarh, bad ruh kawei ka jylla thaiñ North East, ka Mizoram bad ka Jammu and Kashmir.
Baroh ki jingïakhun jong ka Meghalaya kin long hapoh Jaipur ka ban sdang naduh 16 tarik u Risaw.
La ïoh ruh ban kynthup ïa u wei u professional player ba thymmai ha ka kynhun, u Nakul Verma. U la ïoh ban mih bujli ha ka jaka u Punit Bisht, u ba la shongthait noh ha u Nailar hadien ba u la lah ban ïalam ïa ka Meghalaya ha kine ki lympung lehkai kriket ba ladep, u ba la don bynta bad ka kynhun naduh 2018-19, kaba dei ruh ka samoi ba ka Meghalaya ka la ïoh ban rung dalade sha ki lympung ka BCCI.
Kum u Bisht, u Verma u dei u wicketkeeper-batter bad dang shen u la mih madan na ka Services team. U ne u player 32-snem rta na Delhi u la ïoh ban mih madan ha ki 38 sien ki jingïakhun first-class, 54 sien ki one-day bad 43 sien ha ka T20s. U wei pat u ba la shah kynthup thymmai ha ka kynhun u dei u player all-rounder, u Rajesh Bishnoi.
Ka jingkilanmet ban pynkhreh na bynta kane ka lympung kan long naduh 5 tarik haduh 12 tarik u Risaw ha Shillong. Ki nongkitkam lem bad ki player kiba dei na shabar ka Shillong kin hap ban wanpoi naduh ka 4 tarik u Risaw. Ka kynhun, lait noh ki standbys, kin sa mih ban leit shapoh Rajasthan ha ka 13 tarik u Risaw
Ka thup kyrteng jong ki player ban mihkhmat ïa ka Meghalaya ki long: Riboklang Hynniewta, Sylvester Mylliempdah, Arien Bonchang Sangma, Chengkam Sangma, Junjun M Sangma, Mewada Shylla, Sanvert Kurkalang, Kilco R Marak, Lerry G Sangma, Ram Gurung, Anish Charak, Akash K Choudhary, Amiangshu Sen, Rajesh Bishnoi (guest player), Nahul Verma (guest player)
Ki player bujli lane Standbys: Lakhan Singh, Md Nafees Siddique, Adarsh Joshi, Sengpan Sangma, Robert R Sangma
Support staff: Goutam Shome (head coach), Moisten Ch Marak (assistant coach), Vikash Singh Chauhan (trainer), Surojit Biswas (physio), Dhruba Jyoti A Sangma (manager)