Shillong, Iaiong 24: U kyrtong ka Bharatiya Janata Party (BJP) u ban ïakhun ha ka ilekshon ba pynsangeh shwa na Sohiong u bah Seraph Eric Kharbuki, hynne ka sngi ula pyllait paidbah ïa ki mat ïakhun ilekshon.
Haba kren sha ki lad pathai khubor u bah Seraph ula ong ba ka jingmih jong u ban ïakhun ha kane ka ilekshon na Sohiong kadei namar ba u don ka thong ban wanrah ka jingkylla hapoh ka konstitwensi baroh kawei.
U bah Seraph ula ong ba ha kane ka juk mynta ki paidbah ki donkam ïa ki nongmihkhmat ban long ki nongthaw aiñ bad Policy ym tang ki nongmihkhmat kiba bunkam ban sam ïa ki MLA skhim.
Ula ong ba kum u samla u don ka jingthrang ban wanrah da ka Degree College ha Lum Diengiei bad ka Eklavya Residential School hapoh ka konstitwensi naka bynta ban kyntiew ïa ka Pule puthi.
“Kum u samla nga kwah ban wanrah ruh ïa ka ophis Agriculture bad Horticulture, ka state bank of India bad ka Apex bank ha Lum Diengiei, ban kyntiew ïa ka kam jngohkai pyrthei bad ka jingïalehkai hapoh ka konstitwensi da ka ba tei 2 tylli ki mini stadium” la ong u samla Seraph.U samla Seraph ula ong ruh ba ka la donkam ban pynlong aiñ noh ban mang tyngka lyngba ka Corpus Fund sha baroh ki Dorbar Shnong naka bynta ban pyntrei ïa ki kam pynroi ha man ki shnong ki thaw.
Shuh shuh ula ong ba kum u samla lada u jop ha kane ka ilekshon, u don ka thong ban kyntiew ïa ki longïing baduk lyngba ki skhim sorkar pdeng bad ha ka juh ka por un wanrah da ki Street Lights ha baroh kawei ka konstitwensi.
