Pra phom ka HYC ha Ri Bhoi ba shah ktah kti u President ha u VP ka HYC Sengkmie

Nongpoh, Kyllalyngkot 28: Ha ka jingïalam u Samla Jason Lennox Nongrum kum u President ka seng HYC ha Ri Bhoi District mynta ka sngi da ki spah ngut kynthup ki nongïalam bad ki dkhot ki la mih noh na ka seng HYC bad ki la pyndkut noh ïa ka jinglong dkhot hapoh katei ka seng kaba ki la shakri ha Ri Bhoi District.
Kane ka jingmih noh kine ki nongïalam bad ki dkhot ka seng HYC na ka seng ka la paw pyrthei mynta ka sngi ha ka jingïalang kaba la pynlong ha ka ïing Dorbar Hall ka Shnong Umling, ha kaba da kawei ka sur kitei ki nongïalam bad ki dkhot ka seng ha ka jingïalam u Samla Jason Lennox Nongrum ki la shim ïa ka rai bad ki la mih noh na ka seng HYC ha Ri Bhoi District.
Kine kiba la mih noh na ka seng ki kynthup ruh naduh ki nongïalam ka District, ki nongïalam Circle bad ki Unit na ki shnong bapher bapher ka Ri Bhoi District.
Kumba la pynpaw da u Samla Jason Lennox Nongrum, kum u President ka HYC ha Ri Bhoi District la pynpaw ba ka daw kaba la pynlong ïa ki nongïalam bad ki dkhot ban mih noh na ka seng HYC ka dei halor ka nongrim ba kum u President ka District u la shah ktah kti ha Vice President ka sengkmie, u Bah Donboklang Kharlyngdoh bad ruh ba ki don ki kynrum ki kynram hapoh ka seng ba kim lah ban ïa pynbeit hapoh ka seng.
U la ong ruh kumba la shim rai da kine ki nongïalam na ka District, Circle bad Unit kiba la mih noh na ka seng ka daw kaba ki la bitar bad ban shim ïa ka rai ban mih na ka seng HYC na Ri Bhoi, ka dei ka jingsngewjah burom ba u President ka District u shah ktah kti ha u nongïalam ka Sengkmie kaba long ka jingjah burom ym tang ïa ka seng bad ïa ki nongïalam bad ki dkhot ka seng na Ri Bhoi kiba la shañiah ïa u Bah Jason Lennox Nongrum kum u nongïalam hapoh ka District.
U Samla Jason Lennox Nongrum u la ong ruh kane ka jingmih jongki na ka seng ruh kam dei satia ka jingpynbor ïa ki tang namar ba u shah ktah kti ha u nongïalam ka sengkmie bad ma ki hi kum ki nongïalam bad ki dkhot na ka District, Circle bad Unit ki la shim rai ban mih noh na ka seng halor ka jingbym sngewïahap ïa kaei kaba la leh da utei u nongïalam ka seng kmie.
Shuh shuh, u la pynpaw ruh ym dei tang kane ka kam kaba u la shah ktah kti ha u nongïalam ka sengkmie bad ki la don ruh ki kynrum ki kynram hapoh ka seng kiba la pyrshang ba ïa pynbeit na ka bynta ka jingbha ka seng bad phewse ha ka jaka ban ïa pynbeit ïa kitei ki kynrum ki kynram la shah pynibor pynban ha ki nongïalam ba kum ki nongïalam bad ki dkhot na Ri Bhoi district kim lah ban pdiang bad kim hun satia khamtam ka jingshah ktah kti jong u President uba ma ki ki la shañiah ban ïalam hapoh ka District bad uba ju ai ruh ka jingshakri kaba paka ban kyntiew ïa ka seng, u la bynrap.