Rai phet seng bad thang ki nongïalam ka MPYC ïa ki tyngshop u ma Pala bad Deborah

Tura, K’lyngkot 28 : Ki Dkhot ka Meghalaya Pradesh Youth Congress (MPYC) ha ka miet Sngi Thohdieng ki la thang ïa ki tyngshop jong u President ka Meghalaya Pradesh Congress Committee (MPCC) u ma Vincent H Pala bad jong ka Working President ka Deborah C Marak lem bad ki arngut ki kyrtong ha Congress habar ka Congress Bhavan ha Tura.
Kine ki nongialam bad Dkhot ka MPYC ki la thang ïa kine ki tyngshop namar ka jingbitar halor ka jingbym hun ïa ka rukom ai ticket ïa ki kyrtong ban aireng ha kane ka elekshon MLA ban wan.
Ki tyngshop ba la shah thang ki kynthup ïa ka jong u Ma Vincent, ka Deborah, u Kyrtong ka Gambegre Saleng A Sangma bad u kyrtong ka North Tura Billykid A Sangma.
Kane ka la wan hadien ba ki Nongïalam ka MPCC kim shym la mynjur ban pynkylla ïa ka jingai ticket ïa ki kyrtong kumba la aipor ban leh hapoh ka 24 kynta.
Ka MPYC kala dawa ba ki Dkhot ka Party kiba la pan ïa ka ticket ban ïakhun ïa ka elekshon la 27 tarik Rymphang, ki dei ban ïoh ha ka jaka jong ki nongïalam na kiwei pat ki party kiba dang shu wan pynïasoh bad ka Congress.
Kila bitar eh halor ka rai ban ai ticket ïa u Nongïalam ka NCP Saleng Sangma na Gambegre bad u Nongïalam barim ka AITC u Reynold M Sangma na Selsella. U Saleng u dei u pyrsa jong u Billykid A Sangma.
Ki Nongïalam ka MPYC kila pynbna ruh ba kin sa hiar shuki noh na ka party kum ka jingpyrshah ïa ki nongïalam namar ka jingbym sngap ïa ka jingdawa jong ki.