Shillong, Kyllalyngkot 29 : Ha ka 28 tarik Kyllalyngkot 2023 u samla Lambokstarwell Marngar President KSU Sengkmie uba la long kum u kongsan u la ïoh ban pynhap pyrda noh ïa ka Maitshaphrang Inter dong Football Knockout Tournament ba lai sngi ba la pynïaid da ka KSU Mawlai Mawroh Unit ha ka jingïadonlang u Samla Biangbor L.Paliar President ka KSU Mawlai Circle bad ha kumjuh ka por uba dei u Vice-President jong ka KSU Sengkmie kum u Symbud Kongsan.
Ha katei ka sngi pynhap pyrda ka la don ka jingïalang ba lyngkot bal a pynïaid da u Samla Gary Mawlieh Organising KSU Mawlai Mawroh Unit, la ïoh ïa ka jingkren maitphang na u Samla Eddie Malngiang President KSU Mawlai Mawroh Unit. Haba ai jingkren kum u symbud kongsan u samla Biangbor Paliar u la ai ïa ka jingïaroh ïa katei ka shnat treikam kaba la shimkhia ban pynlong ïa kaba kum kane ka Tournament kaba lah ban wanrah ïa ka jingïajan ïa ki khun samla jong kane ka shnong.
Ula ong ba kum ka Seng ka ju pynshlur ïa baroh ki shnat treikam kiba don ha kylleng jong ka Bri U Hynñiewtrep ba kin ai rynsan ïa ki khun samla khnang ba kin lait na ki jingmlien kiba sniew kiba la kharoi stet ha kine ki sngi.
U samla Lambokstarwell Marngar haba kren kum u kongsan u la banjur ba ki samla ki donkam ïa kiba kum kine ki jingïalehkai kilan met namar haba ki khun samla ki shait ki khlaiñ ki lah ban ïakhun ïa kino kino ki bor ba thmu ban wan thombor ïa ka Jaidbynriew, u la ban ruh ba ha kine ki sngi ki don ki bor kiba nabar kiba thmu ban pyntroiñ ïa ka Jaidbynriew da kaba wanrah ïa kiei kiei kiba sniew ha kane ka Ri baieid khnang ba ki samla kin ngam ha kitei ki jingsngewbha kiban long pat ki jingshah hiar thma ba jar jar ïa ka Jaidbynriew.
Kumta u la kyntu ïa ki khun samla ba kin kiar ïa kitei ki jingmlien kiba sniew bad ki bym tei ïa ka imlang ka sahlang bad kin mih shakmat ban shakri ïa ka Ri bad ka Jaidbynriew ha ki bynta bapher bapher kaba ki don.
Ka jingïalehkai phainal ha katei ka sngi ka long hapdeng ka Pingwait pyrshah ïa ka Umsohkhlur ha kaba ka Umsohkhlur kala ïoh ïa ka nam lahduh bad ka la ïoh da ka Trophy bad lai tylli ki syiar katba ka Pingwait ka la ïoh da ka Trophy bad ar tylli ki syiar. Ka la don ruh ka jingsam ïa ki khusnam shimet ha kaba u rangap kol batbit la ïoh da u Badonkupar Kharsohnoh na ka kynhun Pingwait, ïa ka nam nongthep kol ba bun la ïoh da u Neville Majaw na ka Umsohkhlur bad ïa ka nam rang ïalehkai ba tbit la ïoh da Kolestarwell Lyngdoh na ka Umsohkhlur bad ïa ka Discipline Team la ïoh da ka Mawlyndop.
