Tang ki kular shuwa ka elekshon 2018 ruh kim pat pyndep satia: Dr Mukul

Shillong, K’lyngkot 28: U nongïalam ka liang pyrshah ba dei ruh u nongïalam ka All India Trinamool Congress Meghalaya u Dr. Mukul Sangma u la ong ba ki party ha ka MDA khamtam eh ka NPP ki la khlei ki bun bah ki jingkular hynrei khlem pynurlong kawei ruh em.
Haba kren ha ka jingïalang ka party ha Mawshynrut u Dr Mukul u u la ong ba kawei na ki jingkular ka sorkar MDA ba la ïalam da ka NPP kadei ban weng noh ïa ka jingshah khang tih dewiong tang hynriew bnai hadien ba ki thaw sorkar hynrei khlem pynurlong ïa kane wat la ka san snem jong ki ka la poi sha kaba kut ruh.
“Tang ki jingkular ki khlei khlem pynurlong bad kane ka jingleh ka sorkar ka la pynkordit hi khait ïa u paidbah ka jylla bad kiba ïoh jingmyntoi ki dei beit tang ki heh spah. Nga tharai ngi kynmaw bha ba ha ka elekshon 2018 ki la kular ban weng ïa ka jingkhang tih dewiong tang 6 bnai ynda ki wan ha ka bor hynrei kaei kaba ki leh phi tip bha. Namarkata, ka rai bishar kaba ngin ai ïa kane ka sorkar NPP bamsap bad khleiñ la thang jwat la bam ka dei mynta ka kynti lyngba ka vote jong phi,” ong u Dr Mukul.
Haba kren ha ka jingïalang ha Phulbari u DR Mukul u la pynpaw ruh ïa ka jingsngew skhem ba ka TMC kan ïoh ban thaw sorkar ha kane ka kynti kaba mynta namar ki paidbah ka jylla ki sngwthuh ba tang ka TMC kaba lah ban wanrah ïa ka jingkylla u la ong.
“Sngew pangmet ban ïohi ba ha kine ki 5 snem kiba la leit noh ym don kano kano ka jingkham kiew ka jylla hynrei ka nang kham hiar pynban. Ka la donkam kyrkieh ïa ka jingkylla bad donkam ban ïa tylli ban wanrah ïa ka TMC sha ka bor,” u la ong.
Shuh shuh u la takraiñ tyngeh ïa ka sorkar halor ka jingpynbeit pud da kab ong ba ka sorkar ka la lilam ïa ki jaka ka jylla sha ka Assam.
“Nga sakhi da lade ba kae ka sorkar im im peit peit da ka bor ka la aiti ïa ki jaka ki puta jong ka jylla sha ka Assam bad mynta ngi don hangne ban wan ïada ïa ka hok jong phi bad ngin pynbeit pud da ka lynti kaba dei bad ba ngin lah ban leh kumta ngi dokam shuwa ba phin snoh kti bad ngi da ka vote jong phi,” u la ong.
Haba kren sa ha kawei pat ka jingïalang paidbah ha Rongjeng, East Garo Hills, u Dr Mukul u la ong, “Ngi sngewthuh ïa ka jingsliang u paidbah ka jylla bad ka jingwan shim bynta shit rhem sha ki jingïalang ka party ka la sakhi shai kdar ba ki paidbah ki la angnud palat ïa ka jingkylla.”
Shuh shuh na ka liang u Dr Mukul u la takraiñ ïa ka jingkynthah kiwei ki party halor ka We Card bad MYE Card da kaba ong, “Ka NPP kam don thong na bynta ka bit ka biang u paidbah ba duk ba jynjar ban ban trei na ka bynta ka bit ka biang jong baroh bad kum ka party ngi kren shai ba ka jubanlak ba ngi khlei sha u paidbha shuwa ka elekshon ngin pynurlong ynda ngi wan ha ka bor”.