Shillong, K’lyngkot, 28: Ka kynhun jong ki nongpeit pyrman ba kyrpang (Senior Special Observer) ba la phah da ka Election Commission of India (ECI) kiba k ynthup ïa u Special General Observer u Shri. Y. Tripathi, u Special Police Observer u V. Johri, bad u Special Expenditure Observer u B. Murli Kumar ki la wan poi ha kane ka jylla Meghalaya ha ka sngi Thohdieng ban bishar bniah ha kaba ïadei bad ka jingpynkhreh ïa ka jingpynlong ïa ka elekshon sha ka Ingdorbar Thawaiñ ka Jylla ka ban sa long ha ka 27 tarik u Rymphang, 2023.
Kine ki lai ngut ki nongpeit pyrman ba la phah da ka ECI ki la shong ïa ka jingïalang bad u Chief Electoral Officer (CEO) ka Jylla, u State Police Nodal Officer, u Chief Secretary bad u Director General of Police (DGP)
Ha kane ka jingïalang, la pynlong ïa ka jingïathir ïatai ïa kaba ïadei bad ka Election Expenditure Monitoring jong ki Agency ka Sorkar Jylla bad ka Sorkar Pdeng kiba la mihkhmat da ki Nodal Officer kiba kynthup ïa ka Income Tax, ka CGST, ka ED, ka NCB, ka DRI, ka CBIC, ka SLBC, ka RBI, u Airport Director, ka tnat Pulit ka Jylla, ka tnat Excise, tnat Forest, bad ki State GST Commissioners.
Ha ka sngi Saitjaiñ, u Special General Observer u la lum jingïalang sa ïa ki Deputy Commisioner, ki Superintendent Officer bad ïa ki Nodal Officers Election Expenditure Management jong ki 12 tylli ki district ka Jylla ha kaba ïadei bad ka jingpynkhreh ïa ka elekshon.
U Special Observer u la pynpaw ïa ka jingsngewhun ha kaba ïadei bad ka jingpynbit pynbiang jong shlem treikam ka Sorkar Pdeng bad Sorkar Jylla bad ha kajuh ka por u la bthah ruh ba ki dei ban bud pyrkhing ïa ki kyndon ba la bthah da ka Election Commission ha kaba pyntyllun ïa ki kam ba ïadei bad ka elekshon.
Ha kane ka jingïalang, la ïakren ruh ha kaba ïadei bad ka Assured Minimum Facilities (AMFs) nalor ka jingpynthikna ïa ka shongsuk shongsaiñ bad ka jingbuh ïa ki bor pahara CAPF khnang ban weng ïa ka jingshep tieng jong ki nongthep vote.
Ha kaba ïadei bad ka jingpynlut pynsep, u Special Expenditure Observer u la ïai ban ba donkam ïa ka jingïatreilang bad ki shnat treikam bapher bapher da kaba bthah ïa ki FST bad ki SST ban pynlong ka jingpeitngor, ban ai jingpynshai halor ka C-Vigil bad Toll Free number, ban ïatreilang bad ka tnat shipai BSF ha khappud, ban don ïa ki kali FST kiba don ïa ki GPS tracking, bad ki LBM ki dei ban pynthikna baroh ki Bank ki dei ban phah kaiphod manla ka sngi DEO bad sha ka tnat Income Tax bad kiwei kiwei lada don kano kano ka jingisuba ba thep pisa lyngba ki Bank.
