Ioh pdiang ar ngut ki khynnah ïa ka khusnam riewshlur na ka Indian Council for Child Welfare

Nongpoh, Kyllalyngkot 28: Ki 2ngut ki khynnah kiba la tip kyrteng kum U Forme Khongji na ka Shnong Umkrem, East Khasi Hills bad u Wallambok Rani na ka Umden Arka na Ri Bhoi District ki la ioh pdiang ïa ka Nam Riewshlur na ka Indian Council For Child Welfare (ICCW), ha Nongbah Delhi.
Ka jingioh pdiang kine ki ar ngut ki heprit ïa kane ka khusnam riewshlur na ka ri India, ka dei halor ki kam shlur jongki ba ki la lah ban pynlait im ïa kiba ngam jyllop ha ki wah, kaba la jia hapoh ka jylla Meghalaya.
Ïa katei ka Khusnam Riewshlur ba la sam ha ka 25 tarik u Kyllalyngkot shi sngi shwa ka jingrakhe ïa ka Republic Day ba la sam da u U Vice- Admiral B.S Randhawa, uwei na ki heh shipai Duriaw bad la don ryngkat lang ruh u Air Marshall, u Sumit Mukherji PVSM SC VCM, Major General, VIKRAM DEV Dogra, AVCM. Baroh kiba la ioh pdiang ïa katei ka khusnam ki long 56 ngut na ki 17 tylli ki jylla hapoh ka ri India.
Ka long ka burom kaba khraw ïa ka Ri hi baroh kawei ba dang don kum kine ki Riewshlur kiba len ïalade na ka bynta ban pynlait im ïa kiwei bad kum ki nongshong shnong ka ri India ki dei ban bud ïa ka nuksa jong kine ki riew shlur ban len lade na ka bynta kiwei bad na ka bynta ka ri lajong, ong u Major General VIKRAM DEV Dogra ha ba ai jingkren kum u wei na ki kongsan ha katei ka jingïalang pynkup burom ha Nongbah Delhi.
Kine ki ar ngut ki heprit na Meghalaya mynta ka sngi ki la wan phai ing noh hadien ba la ioh pdiang ïa katei ka khusnam riewshlur bad hadien ba la poi ha Nongpoh la pynkup burom ruh ïa ki da ka Hills Farmers Union na Ri Bhoi District, ha ka jingdon ka Kong Jecinta Lyngdoh kum kawei na ka dkhot ka seng ryngkat kiwei ki dkhot bad ruh ha ka jigndon lang u Bah Alfonse Kharsyntiew uba la synran ïa kine ki ar ngut ki Heprit ha Nongbah Delhi bad haduh ba ki la wan phai biang sha la ing la sem.
Kane ka jingpdiang burom ka Hills Farmers Union ka dei shi bynta ban pynpaw ka jingkmen ïa kine ki ar ngut ki heprit kiba la ioh pdiang ïa katei ka khusnam riewshlur bad ba ki la wan rah ïa ka nam bad ka burom ïa jaid bynriew bad ka jylla hi baroh kawei, ong ka Kong Jecinta Lyngdoh, kawei na ka dkhot katei ka seng nongrep bad kum ka seng nongrep ki la pynshlur ruh ïa kine ki Heprit ba kin dang trei shitom ha ka jingim khnang ba kin dang long kita ki samla ka jaid bynriew kiba don ïa ka dor na kabynta ban shakri na ka bynta ka bha ka miat bad ka roi ka par ki paidbah, ka la bynrap.