Naiwieng 02: Ka kynhun jong ki 14 ngut ki nongthoh khubor na Maharashtra ki la pynkut ïa ka jingwan jngoh ïa ka Meghalaya da kaba leit sha Shillong Press Club mynta ka sngi bad la pdiang burom da u President jong ka Shillong Press Club, Bah David Laitphlang ïa kane ka kynhun ki nongthoh khubor.
Kine ki nongthoh khubor ki la iakren bad ki nongthoh khubor na Shillong ha kaba la don ka jingïakren shaphang ki jingshem jong ki ha kine ki ar tylli ki jylla. Shuh shuh na ka liang jong u President ka Press Club u la batai shaphang katto katne ki sienjam ba la shim na ka bynta ka bha ka miat jong ki nongthoh khubor ha Meghalaya.
Ki nongthoh khubor na Shillong ki la ïohsngew shaphang ki rukom treikam jong ki nongthoh khubor ha Maharashtra bad ki jingpynbiang kiba don ha katei ka jylla na ka bynta ka bha ka miat jong ki nongthoh khubor.
Ha kane ka jingwan kaba 3 sngi, kane ka kynhun jong ki nongthoh khubor ka la ïakynduh ïa ki kynhun bapher bapher bad ruh ki riew pawkhmat jong ka jylla kiba kynthup u Lat ka jylla, u Phagu Chauhan ha ka 31 tarik u Risaw.
Ki la iakynduh ïa u DG Assam Rifles Lieutenant General P C Nair ha Headquarter Assam Rifles, Laitkor. Ha ka jingïakren bad u DG, ki la ïakren shaphang ka jingshngain ha ka thain shatei lammihngi, ki jinglong jingman ha Manipur bad ki jingeh ba kane ka kynhun ka ïakynduh.
Kine ki nongthoh khubor ki la leit jngoh ruh ïa ka Prime Start Up Hub, ka kynhun kaba don ka bynta kaba khraw ha ka jingkyntiew ïa ki kam startup ha Meghalaya.
Ki la ïohsngew kumno kane ka kynhun ka ïalam lynti ïa ki startup bad ki kam bapher bapher kum ki kam jngoh kai, ki kam kiba ïadei bad ki jait jingbam tynrai jong ka thain shatei lammihngi, ki kam shna tiar tynrai bad ki kam thaiñ jaiñ. La pyntip ïa ki ba haduh mynta, kane ka kynhun ka la ïalam lynti ïa palat 550 tylli ki startup bad ka la pynkylla ïa ka jingim jong ki briew da kaba plié lad kamai kajih. Kane ka kynhun ka la leit peit ruh ïa ka ophis jong ka Khasi Hills Autonomous District Council ban sngewthuh kham bha ïa ka rukom treikam kane ka ophis bad ka la ïakynduh ïa u Deputy CEM jong ka KHADC, Bah Pynshngain N. Syiem, Chairman, u Bah Lamphrang Blah bad Executive Member, Bah Fantin J. Lakadong ha ka jingiadon lang ki ophisar jong ka KHADC. Kine ki nongthoh khubor na Maharashtra ki la kmen ban ïohsngew shaphang ka dustur ba kyrpang hangne ha kaba ngi ju ai jait sha ka liang jong ka kmie bad ka la ïoh jingbatai ruh shaphang ka rukom treikam ka Khasi Hills Autonomous District Council (KHADC) ban iada bad pynneh ïa ki rukom tynrai.
Ka kynhun mynta ka sngi ka la leit ruh sha North Eastern Council (NEC) bad ka la ïakren bad u Secretary K Moses Chalai, uba la ai jingtip shaphang ka thong jong ka Council bad ki skhim bapher bapher ba la pyntreikam da ka council haduh mynta ha ka thaiñ. U Secretary u la batai ruh shaphang ki jingjop jong ka NEC ha ka jingkyntiew ïa ki jingdon jingem ha ka thaiñ. U Chalai u la pynkynkaw biang ba u Myntri Rangbah duh u la phaikhmat kyrpang sha ka thaiñ shatei lammihngi bad ha kine ki khyndai snem ba la leit ka la don ka jingkiew kaba kongsan ha ki jingdon jingem ha ka thaiñ.
Hadien kane, ka kynhun jong ki nongthoh khubor ka la ïoh ban sakhi ïa ka Shad Nongkrem, ka tamasa ba ïadei bad ka deiriti jong ki Khasi ha Meghalaya ba ju rakhe ha ka aïom Synrai ha Smit.
Ki la ïapbieit ïa ka jingriewspah ka deiriti bad ki riam ba itynnad bad shongkhia jong ki samla nongshad. Kum shi bynta ka jinglehniam bad ka jingshad kaba ar sngi kaba ju long shisien shi snem lane ka ‘Pomblang’, mynta ka sngi, u Syiem jong ka Hima Khyrim, ryngkat bad baroh ki Myntri, Duhalia, ki la pynlong ïa ka ‘Pomblang Iewduh’ ha u lum pomblang, ha Smit.
Kane ka jinglehniam kadei na ka bynta u nongialam jong ka ri Khasi, ki longshuwa jong ka Kur kaba synshar bad ia U-Lei Shyllong. Ha kaba kut jong ka jingwan kaba 3 sngi sha Meghalaya, ka kynhun ki nongthoh khubor ba ïalam da ka Jaydevi Pujari Swami, Deputy Director, PIB Mumbai ka la ïaroh ïa ka jingriewspah ka deiriti jong ki briew ka jylla Meghalaya bad ka jinglah jong ki Khasi ban pynneh ïa ka deiriti.
Ki la pynpaw ka jingsngewnguh jong ki ia ka sorkar jylla bad ki tnat sorkar pdeng bapher bapher kiba la ai jingtip shaphang ki sienjam bapher bapher ba ïadei bad ka roi ka par ba la shim ha ka jylla na ka bynta ka bha ka miat jong ki briew.
