Ka jingwan iuhkjat ki kompani bapher bapher ha kane ka jylla ki long ka kabu ïa ki samla wadkam kiba ïaksaid ha kane ka pyrthei bad ka juk hiran na ka jingkyrduh kam kaba long shaba palat. Ki Samla kiba la nang la stad ki mad ïa ka jingeh kaba khraw ban rungkam ha ki tnat sorkar bapher bapher namar ba la bun palat kiba la nang la stad. Hynrei ka jingwan iuhkjat jong ki Kompani kiba na shabar ka jylla ki long ka kabu kaba bha tam ïa ki samla kiba la biang ka kyrdan jingnang jingstad ban ym pynlehnoh ei ïa ka kabu ban don ha la ka ri ban shakri ha ka kam kaba ki don.
Haba peit ïa ka jingkharoi ki Karkhana kiba don ha kylleng ka jylla ki kylla long pynban ki ktem thungkam thungjam ïa kiwei pat ki samla ba la nang la stad na kiwei pat ki jylla kiba knieh noh ïa ka pliangja jong ki samla trai ri trai muluk kiba mad ïa ka shyngkan khait ha ka wadkam wadjam.
Ym lah ban leh da ki phew hajar ngut ki samla kiba la nang la stad ki la mih na la ka jong ka jylla ban leit wad jakpoh sha kiwei pat ki jylla bapher bapher kiba don ha kyleng ka ri India.
Haba phai sha ka jingpass jong ki samla pule kiba pyndep ïa ka Graduate bad Post Graduate manla u snem ka long beit da ki hajar ngut, hato hangno ka Sorkar kan pynrungkam ïa kine ki samla, lada khein tang wat tang ïa ki khyndiat ngut ki samla kiba la pass bha shakhmat ruh. Lehse da ka jingwan jong ki Kompani, na shabar jylla ban seng kam sengjam ha kane ka jylla dei ban pynshlur bad ailad bad dei ban don ka mynsiem kaba jynsur khyndiat. Namar ban long niangraithoh than ïa kaba bha kam long satia kaba dei. Haoid, shwa ban pdiang ïa ka jing wan iuhkjat jong ki Kompani ka Sorkar Jylla ka dei ban pyntreikam ïa ki kyndon aiñ kiba la don lypa bad ka dei ruh ban pynthikna ba ki Kompani kiba wan sengkam ha kane ka jylla ki dei ban thungkam shwa ïa ki samla na ka jylla 100 na ka 100 katkum ka kyrdan bad ka jingtbit ba ki samla wadkam ki don jingtbit.
Hynrei, hateng hateng la shem ba ka jingwan kine ki Kompani na shabar jylla ki long pynban tang kum ki thliem khlemkhmat kiba imat tang ka khlong bad pyrkhing ïa ka jingpynrungkam ïa ki samla trai jylla. Bun bun sien, la lap ba kine ki Kompani ha ki Soskular ba ki ïasoi bad ki Shnong ka long beit ban ai kam ai jam shwa ïa ki trai jylla ha ki kam ba ki la don jingtbit, hynrei, ynda haba ki samla ki la rung ha ka kam, ki heh nongpynïaid ki pyni ïa ka rukom pynïaid kaba sngewjli ban sngap namar ki ïaleh ban noin ïa ki nongtrei kat haduh ba ki samla na ka j ylla kiba rungkam kim banse ban mih noh na ka kam. Dei hangne ba ki heh nongpynïaid jong ki Kompani ki pynpaw ha ki por ba leit jurip ki Sengbhalang lada kylli balei ym lah ban thungkam ïa ki samla trai jylla, ka jubab ba kin ai kan long beit ba ki jaituh bad kim lah ban trei ïa ka kam. Hynrei sha lyndet jong kane ka long ba ki Kompani ki la pynap lypa da ki briew la jong.
Katba nang mih ki sngi, la ju sakhi haba lait post ha ki shnat treikam bapher bapher ka Sorkar Jylla da ki phew hajar ngut ki samla ki leit ban aplai ïa ki kam balait. Ka Sorkar Jylla ka la dei ban pyrkhat janai ïa ka lawei jong ki samla ha kane ka juk namar katba shaba phai ki samla kim banse ban trei ïa ki kam barit baria tang ban lait ka shah thngan bad bunsien ki ngop ruh ha ki jingshah pynbiej aikam aijam ha ki riewthok riewshukor kiba kloi wat ban pah ban phon ïa ki samla wadkam kiba kloi ban bei pisa tang ban ïoh ïa ka kam ha kano kano ka tnat kaba lait.
