Mynta ka sngi yn sdang ka SLFC ïa ka lynti ïaid ha ka I-League
Shabar nala ïing yn aireng ïa ka Mohammedan SC.
Kolkata, Naiwieng 02: Mynta ka sngi ka kynhun lehkai phutbol Shillong Lajong ka la pynkhreh ban sdang ïa ka lynti ïaid jong ka ha ka I-League 2023-24 lyngba ka jingïakhun ka ban long shabar nala ïing pyrshah ïa ka Mohammedan Sporting Club. ïa kane ka jingïakhun yn pynïakhun ha madan Naihati Bankimanjali Stadium ha Naihati, Kolkata mynta ka sngi (03 tarik Naiwieng, 2023).
Kumban shu pynkynmaw, ka Shillong Lajong ka dei kawei napdeng ar tylli ki kynhun ba la shah kyntiew kyrdan ha ka I-League mynta ka samoi. Ka la pyndep ha ka kyrdan ba ar ha ka 2nd division, shadien ka Delhi.
Shuh shuh, kane ka dei ka samoi ba shiphew jong ka Lajong ha ka I-League bad ka sien ba nyngkong hadien saw snem ba la shah sloit ba ka Shillong Lajong kan ïoh ïakhun biang ha ka 1st-division I-League. Kane ka kynhun ka la shah weng noh na kane ka lympung ha ka samoi lehkai 2018-19 naba wan shatrai duh ka miej ïakheiñ point.
Ha kawei pat ka liang, ka Mohammedan Sporting Club ka kynhun ba ka Shillong Lajong kan ïakhun mynta ka sngi, ka la plie pyrda ïa ka I-League mynta ka samoi pyrshah ïa ka Aizawl FC bad khur ïa ka namjop da 2-1 kol.
Haba ai jingkren sha ki lad pathai khubor na ka liang jong u Coach ka kynhunm, u Bobby Nongbet u la ong, “Hadien ba ngi kiew kyrdan biang ha ka I-League Nga dap da ka jingkmen kaba khraw. Nga phaikhmat ruh na bynta kane ka jingïakhun ba nyngkong ba ngin sdang, ka ban long mynta ka sngi pyrshah ïa ka Mohammedan Sporting bad kane kan long ka jingïakhun kaba jwat na bynta ka kynhun.”
“Ka long ka samoi kaba eh ïa ka kynhun naba ka por ban pynkhreh ka long kaba lyngkot eh hadien ba ngi la ïohrung, Ngi hap ban stad kino ki player ba ngi hap ban soi. Bun ki player ki dei ba dang khie san bad ki rangïalehkai kiba la kham shemphang kiba kynthup ïa u Phrangki, Kenstar, Kynsai, Allen ki la wanphai biang bad ka kynhun, kynthup ruh saw ngut ki player na shabar ba ka klob ka samoi na bynta kane ka samoi.
“Kane kan dei kawei na ki jingïakhun ba jwat ïa ka Lajong namar ka dei ka jingïalehkai ka ban long shabar nala ïing nalor kata pyrshah ïa ka kynhun kaba khlaiñbor, kaba pynliem ïa ka Aizawl FC ha ka sngi sdang”.
ïa kane ka jingïakhun yn pyni live lyngba ka Eurosport India kumjuh ruh na ka Indian Football YouTube channel & Fancode ïa kiba pyndonkam OTT.