Shillong, Naiwieng 02: Hynnin ka Sngi Balang (01 tarik Naiwieng, 2023) ka KSU East Jaintia Hills District Unit lyngba ka Sports Committee ka la leit ban pynkup burom ïa ka Heprit Rukini Dkhar ha ïingsah jong ka kum ka dak ban pynpaw ïa ka jingsngewkmen hadien ba ka la ïoh rah ïa ka Takma Rupa haka U- 14 Girls’ 600 m Race haka lympung ïalehkai 34 East Zone Champion 2023 kaba la long ha jylla West Bengal.
Ka seng ka dap da ka jingsngewsarong na bynta kane ka Heprit kaba trei shitom haduh bad wanrah ruh ïa nam bad ka burom ïa ka Shnong ka thaw, District bad ïa ka jylla hi baroh kawei. Bad na ka liang jong ka seng ka kyrmen skhem ba i ne i heprit in dang bteng ban trei shitom bad ban khur pat sa ïa kiwei de ki takma ban wanrah nam bad burom ïa ka District bad ka jaitbynriew Khasi baroh kawei.
Nalor kane, ka Seng ka la pynpaw ïa ka jingsngewkmen ban tip ba kane ka Heprit ka la shah jied ruh haka Sports Authority of India (SAI), Shillong ban dang kham pyntbit shuh shuh ïalade haka ne ka shlem ai jinghiakai ïa ki Samla ba don sap ha ki rynsan ïakop ki lympung bapher bapher.
Shuh shuh na ka liang jong ka Seng kala kitbok kitrwiang ïa i ne i Heprit ban in nangkiew haka kam ïalehkai shuwa ba kan leit ban ïasoh bad ka shlem ai jinghikai jong ka SAI, Shillong.
