Shillong, Naiwieng 02: Ki ar tylli ki jingïakhun jong ka lympung SSA 2nd DIVISION Football League 2023 kaba la long hynne ka sngi ha madan 1st Ground SSA Stadium, ka la jam sha kaba kut ha kaba ka Pohkseh SC ryngkat bad ka Lumshyiap SC ki la khur ïa ka namjop.
Haba phai sha ka jingïakhun kaba nyngkong kaba la sdang ha ka por 11:30 baje mynsngi hapdeg ka Nongrah SC pyrshah ïa ka Pohkseh SC, ka jingïakhun ka la kut ha kaba ka Pohkseh SC ka la jop suk da 3 kol.
Ka Pohkseh SC ka la ïoh ban pynkhihjar nyngkong tang hadien ar minit ba la ïaid ka por lyngba u Freddy Jyrwa, nangta ka kol kaba ar la thep da u Mickyson Tynsong ha ka 45 minit bad khadduh na u Rishem Wanniang ha ka 77 minit.
Haba phai pat sha ka jingïakhun kaba ar kaba la sdang ha ka por 2 baje nohphaisngi, ka kynhun lehkai jong ka Lumshyiap SC ka la pynjemkhnap ïa ka Imson SC da kaba pynbam haduh 4 kol. U Fairborn Lyngdoh u la ïoh ban thep ar kol na bynta ka kynhun ha ka 24 & 32 minit, nangta bud sa ka kol kaba lai na u Andrew Paswet ha ka 36 minit bad khadduh na u Nickhil Lyngkhoi ha ka 47 minit.
Ka jingïalehkai SSA 2nd Division mynta ka Sngi Thohdieng ha madan 1st Ground SSA Stadium, kan sdang biang ha ka por 11:30 baje mynsngi, nyngkong ka Sohiong SC pyrshah ïa ka Nongkrem FC bud sa ka jingïakhun ha ka por 2 baje nohphaisngi hapdeng ka Umphrup SC pyrshah ïa ka Laitkyrhong SC.
