Poi ka sboh dawai sha thaiñ Mawkynrew lyngba kiba la ïoh ‘license’, pyllait paidbah u MLA ha Thynroit

Shillong, Jylliew 27: Ka dawai sboh kaba la kylla long kum ka mat ïakren kaba shongshit bha ha shwa ka elekshon MLA 2023 mynta ka la poi sha ki shnong ki thaw ban die pat ïa ka sha ki nongrep lyngba ki nongsam lane ki distributor kiba ka tnad kam rep ka la ai ruh ïa ki da ki License.
Kum ban shu kdew ba ha u snem 2022 kata ha ka por ba u Bah Banteidor Lyngdoh u dang peit ïa ka tnad kam rep ka Sorkar Jylla kum u Myntri , ka tnad ka la pynmih ïa ka Office Order ha ka 9 tarik u Nailar ban shah ïa ki nongrep ban bteng pyndonkam dawai sboh hadien ka jingangnud kaba la neh phra snem eiei.
Kane ka la wan urlong naduh ba ka Sorkar Jylla ka la pynsangeh ïa ka subsidy na ka bynta ki dawai sboh sha ki nongrep ha ka 12 tarik u Jylliew, 2014 halor ka nongrim ban pynduna ïa ka jingktah ki dawai sboh kum ka Urea, DAP, MOP bad SSP ïa ka koit ka khiah ki nongshong shnong.
Ka jingwanrah ïa ka Office Order ban shah pyndonkam dawai sboh ka long ha ki katto katne ki jaka rep namar la ïohi ïa ka jingdonkam na ka bynta ki mar rep kum u phan, sohsaw, u kubi, u phul bad kiwei kiba ju rep kynrei ha ka Jylla.
Ha ki phra snem, ka jingïoh dawai sboh ki nongrep ka la long lyngba ki ïew ki hat ha kaba ki hap ban thied tuh ha ka dor kaba rem bha bad kiba die ruh ki shim kabu ïa ki nongrep.
Ym tang kata, ha ka 22 tarik utei u bnai, u Bah Banteidor lem bad ki ophisar ki la pynbna paidbah ïa katei ka Office Order da kaba ai ka burom ba ka dei ka jingjop ki nongrep ha ka shnong Mawkatheiñ ha kaba da ki phew hajar ngut ki nongrep na kylleng ki shnong ki la wan ban sakhi.
Tang shi sngi hadien, u Bah Banteidor kata ha ka 23 tarik u Nailar, 2022 u la da kloi ban leit ban ïakren ia kane ka mat bad u Myntri Khynnah ba dei khmih ia ka tnad Chemicals and Fertilizers ka Sorkar India u Bhagwant Khuba ha Delhi ban bhah dawai sboh noh sha ki nongrep ka Jylla lyngba ka MeCOFED.
Ki bnai ki la tyllun bad mynta ka dawai sboh ka la wan poi bad ki nongrep ruh kin ïoh ban thied ha ka dor kaba duna ryngkat ka subsidy na ki nongsam ba la ïoh license.
Kum ka dak ka jingpyllait paidbah ïa ka dawai sboh, u Bah Banteidor, MLA ka Mawkynrew bad uba dei mynta u Chief Advisor ha ka tnad kam rep ka Sorkar Jylla u la aiti ïa ki song dawai sboh sha ki nongsam dawai sboh ha ka jingïalang pynshai paidbah ïa ka jingpyndonkam dawai sboh ha Thynroit ha ka 26 tarik u Jylliew, 2023 ban sam pat sha ki nongrep ka thaiñ Mawkynrew.
Ha kane ka jingïalang la ïa donlang da ki ophisar na ka Directorate of Agriculture, ki nongïalam shnong ba kynthup ïa u Sordar ka Thynroit, Bah Harkin Warjri, u Sordar ka shnong Jongksha, Bah Olet Kharsahnoh, ki nongïoh license ban sam dawai sboh, ki nongrep lem ki nongshong shnong.
Haba kren ha katei ka jingïalang, u Bah Banteidor u la kyntu ïa ki paidbah ban klet noh ïa ka politik hynrei ban ïa trei lang na ka bynta ka jingmyntoi jong ki paidbah. “Ngam kwah ban leh politik ïa ka im ka iap jong ki nongrep hynrei ban ïatreilang bad ban ai jingkyrshan na ka bynta ka jingmyntoi jong ki”, u la ong da kaba kyntu ruh ïa ki ba kin long kiba ïa tylli mlon ym ban ïa pait ïapra namar kane kan ktah ïa ki khamtam haba ïa dei bad ka jingdie ïa ki mar rep kiba ki pynmih.
“Ka dawai sboh kaba pyllait mynta ka sngi kan don ha ki jaka die kiba la ïoh licence bad kam long kum kato ka dawai kaba pylliat da mano re ha shuwa ka ilekshon kaba tang shu pyllait ka trok kaba wan kit tang shiphang ka jah noh”, u la ong.
Ha kane ka sngi ki ophisar na ka tnad kam rep ki la ai jingai jinghikai halor kumno ban pyndonkam ïa ka dawai ha ki jingthung khnang ba kan ym don jingktah. Ki la batai ruh ïa ki jait ki dawai ki ba biang ban pyndonkam na ka bynta ki jingthung kiba ki thung bad kumno ki dei ban leh lada ka khyndew ka la duna ka jingsboh.
Na ka liang ki nongïalam shnong bad ki nongrep ki la pynpaw ka jingsngew kmen ba ka jingangnud ka la urlong da kaba ai khublei ïa u MLA jong ki uba la trei shitom ryngkat ki ophisar ka tnad kam rep ban pynïoh biang ïa kaba kim shym la mutdur shuh.