Nongpoh, Jymmang 24: U Symbud Myntri rangbah ka jylla, u Bah Prestone Tynsong mynta ka sngi kum u kongsan u la wan ban plie paidbah ïa ki ar tylli ki kam pynroi ha ka Shnong Umsaitsning ha Ri Bhoi, kiba kynthup ïa ka jingkieng ïaid kali bad ka surok rong ba thymmai kaba dei katkum ka jingdonkam jong ki paidbah ka shnoing Umsmu bad kiwei ki shnong ba hap ha ka thaiñ Umsaitsning ha Ri Bhoi.
Ïa kane ka Jingkieng (Motorable Bridge) bad ka surrok la tei lyngba ka skhim ba la tip kum ka Rural Infrastructure Development Fund (URDF) ba la bei tyngka lyngba ka NABARD ha ka jingjlut jingsep kaba la kot sha ka Rs. 2.80 klur.
Haba plie paidbah ïa kine ki kam pynroi ha kitei ki shnong, la sakhi lang ruh da ka jingdon lang u MLA ka Umsning, u Bah Jason Mawlong, ka MDC, ka Kong Macdalyne Mawlong, u Deputy Commissioner ka Ri Bhoi, u Arpit Upadhyaya, u Executive Engineer ka PWD, Umsning, u Bah Rymphang Kharkongngor bad kynthup kiwei kiwei ki ophisar sorkar.
La pynphuh pynphieng bad pynshit pynshngain ruh ha kane ka sngi da ka jingdon lang ki padibah nongshong shnong bad ki nongïalam shnong kitei ki shnong kiba la pynpaw ka jingkmen ban ioh ïa katei ka jingkieng bad ka surok ba thymmai ba kin suk ha ka leit ka wan katkum ka jingdonkam jong ki paidbah.Haba kren ha kane ka sngi kum u kongsan, u Symbut Myntri rangbah ka jylla, u Bah Prestone Tynsong u la kyntu ïa ki paidbah kitei ki shnong ba ha ka jylla hi baroh kawei ba kim dei ban sngap ïa ki khubor thok ki khubor shukor bad kumba la paw ha kine ki sngi tang na ka daw ka jingtwa ka khyndew ha ki surok bad ka jingtwa ka jingtei jong ka ingdorbar thaw ain ki la kynnoh ba kane ka sorkar ka dei ka sorkar kaba lute bad kaba kjit ïa ka pisa ki paidbah, hynrei kim ju tih ne wad bniah ïa ki kam pynroi ba kane ka sorkar MDA ka wan rah na ka bynta ka jingdonkam jong ki paidbah hapoh ka jylla.U la ong ruh ba u Bah Prestone Tynsong u dei u briew uba tip briew tip blei bad kum u nongïalam ha ka sorkar ym nym ïalam bakla ïa ki paidbah bad ka jinglong kum kita ki nongïalam hapoh ka sorkar kam dei ban shu lute ne kjit na ki paidbah, hynrei ka sokar ïa ïaleh ban thaw ki lad ki lynti ban wan rah bun ki jingkylla bad kaei kaba sngewsih lada don tang katto katne ki jingduna kiba bun ki la kren bein ne niew tang ba kane ka sorkar kam leh ei ei na ka bynta ki paidbah.
Ki shnong ba hap ha ka thain Umsaitsning kin nym ioh ïa kane ka surok rong ba thymmai bad ruh ka jingkieng ïaid kali lada ym dei na ka sorkar MDA” ong u Bah Prestone Tynsong bad bynrap ruh bun ki briew kiba pyrshang ban ïalam bakla ïa ki paidbah da kaba ai ïa ki khubor lamler ban kynnoh kynta ïa ka sorkar, hynrei kum ki nongshong shnong ba la stad kim dei ban ngeit beij bad ki dei hi ban bishar na lade aiu kane ka sorkar ka la leh na kabynta ki paidbah” u la bynrap.
U la ong ruh haba ngi long ki nongmihkhmat paidbah ngim lait na ka jingshah kren bein ne kren sniew bad khamtam ha kane ka kynti ba la jan poi sha ka samoi jied nongmihkhmat bun bah kin wan ban pynbieh ne ban shna ïa ki khubor thok ban kynnoh da kumne kumtei ïa ka sorkar bad na ka liang ka sorkar MDA kan nym shong kli kti bad ka kamram jong ka sorkar ka long ban wan rah ïa ka roi ka par bad ka jingkylla hapoh ka jylla, u la ong.
