Jowai, Jymmang 25: Ka jingsniew palat u surok Jowai By-Pass na lad Mukhla haduh Soo mer (Mihmyntdu) kala nang jur katba dang mih ki sngi bad kane kala buh jingeh pynban ïa ki kali ban ïaid lynti naduh ki kali rit wat haduh ki kali heh.
Kane baroh ka paw tang na ka daw ka jingbym ïohi jong ka sorkar halor ka jingsniew jong ka surok kaba la buh jingeh ïa ki paidbah nongleit nongwan, shuh shuh une u surok NH-6 uba lah pynïasoh ïa kiba bun tylli ki jylla jong ka thaiñ shatei lam Mihngi (North East).
Kane ka jingsniew ka surok NH-6 kam dei tang ha ki bynta jong ka surok By-Pass hynrei kane ka jia kumjuh ha shi lynter ka surok Jowai-Shillong khamtam naduh Ummulong haduh Mawryngkneng.
Ha ki bynta ka surok Jowai By-Pass la sakhi ba ka jingsniew kala jur shaba palat haduh katta katta kaba la pynshitom ïa ki kali ba ïaid namar ka jingbun palat ki thliew baheh baheh nalor sa ka jingdap um ki thliew.
Ki don ruh ki kali heh kiba ïa takhuh para maki tang namar kitei ki thliew ba heh, kiba la hap ban pynïakhun ïa ki nongñiah kali ban pynïaid ïa ki shaka kali ban lait na ka jinghap hapoh kitei ki thliew, lada peit bha ïa katei ka surok kala long kum ka surok khlaw kaba hap ban ïaid tang da ki trok Shaktiman ne ki trok 4 wheel.
