Plie u Symbud Myntri Rangbah ïaka jingrakhe dap 100 snem ka St. Mary Mazzarello Girls’ HSS Jowai

Jowai, Naiwieng 08 : U Symbud Myntri Rangbah ka sorkar jylla u ma Sniawbhalang Dhar mynta ka sngi Saitjaiñ 8 tarik u Naiwieng, 2025 ula wan ban plie ïa ka jingsdang jong ka jingrakhe dap 100 snem ka St. Mary Mazzarello Girls’ Higher Secondary School, Jowai haka liang ka jingshakri ïa ka jingnang jingstad ïa ki khynnah skul ka thaiñ.
Ha kane ka sngi la wan ban donlang da u Ferdinand Dkhar u Bishop ka Jowai Diocese, u President ka Seiñraij Jowai ma H. Toi, ki Sister jong ka skul, ki nonghikai bad ki khynnah skul kila la pynphuh pynphieng shuh shuh ïa kane ka sngi da jingrwai bad ki jingshad.
U kongsan haba ai jingkren ula ai jingïaroh ïa kane ka skul kala ai jingshakri haka pule pithi da kaba kynjoh sha ka 100 snem mynta bad kala long kawei na ki skul kaba la rim bha ha kane ka thaiñ, haka juh ka por ula kyntu ïa ki khynnah skul ba kin long kiba minot bad kiba trei shitom haka jingim.
Ha ka juh ka por u Symbud Myntri Rangbah ula kular ban pynïoh jingïarap pisa na ka sorkar kaba long haduh 20 lak ïa kane ka skul, shi bynta na ka jingrakhe jong ka ïa ka jingdap 100 snem ïa kaba yn pynkut ha u snem 2026.
Ïa kane ka skul la seng naduh u snem 8 tarik u September 1926 da ka jingdon 9 ngut ki khynnah skul bad ïa ka ïing skul la shan tang da ki siej, katba ha u snem 1940 la plie ïa ka Primary Section, ha ka snem 1968 ka skul kala ïoh jingithuh kum ka Secondary School na ka Assam Board bad haka snem 1974 kala ïoh jingithuh pat na ka MBOSE bad ha u snem 1999 ka skul kala ïoh jingbit ban kyntiew kyrdan sha ka Higher Secondary bad ïa katei ka kyrdan la sdang ha u snem 2001 lem bad 18 ngut ki khynnah skul.
Shi bynta na kane ka jingrakhe 100 snem ka jingïaid lynti ka skul kala pynkhreh ha une u bnai ban wan yn shan ïa ka Calendar kum ka dak jong ka jingsah kynmaw burom, ha kane ka sngi ka skul kala aiti ruh ïa ka Memorandum ha u Myntri.