Plie u Symbud Myntri Rangbah ïa ka ‘Baroto Police Outpost’, kyntu ban ïatreilang bad ka tnad pulit

Jowai, Jymmang 08: Kum ka dak jong ka sngi sah kynmaw mynta ka sngi 9 tarik u Jymmang, 2026 ka tnad pule haka sien kaba ar kala ïoh ban plie pura ïaka ‘Baroto Police Outpost’ West Jaiñtia Hills District haka jingïalang bala pynlong ha phyllaw katei ka BPO kaba don ha shnong Baroto kaba hap hapoh ka Elaka Shilliang Myntang.
Ïa u mawnongrim la wan ban plie pyrda da u Symbud Myntri Rangbah ka sorkar jylla u bah Prestone Tynsong uba dei peit ïaka tnad Home (Police), haka jingdonlang u ma Sniawbhalang Dhar u Symbud Myntri Rangbah, u MLA ka Mowkaiaw ma Nujorki Sungoh, ka Director General of Police ka kong Idashisha Nongrang, IPS, u Deputy Commissioner, u Superintendent of Police ka WJHD, ki ophisar bad ki paibbah nongshong shnong ka thaiñ, nalor kiwei de.
La pynsngew ba ïa kane ka Baroto Police Outpost la pynïoh jingïarap pisa lyngba ka skim Police Infrastructure Renovation Fund (PIRF) ïa kaba la pyntrei ha ki hynriew bnai, da ka jingkyrmen skhem ba ka sorkar kan dang bteng ban pyllait shuh shuh ïa ki skim jingïarap naka bynta kiwei de ki jingtei ha ki ophis pulit kiba don hapoh ka District.
Ka jingdon jong kane ka Police Outpost kan ïarap shibun eh ban wanrah ïa ka jingshongsuk shong shngaiñ bad ïa ki shnong ba marjan kiba don ha khappud, shuh shuh la pynsngew ba ka shnong Barato kaba kynjoh sha 7 hajar ngut ki nongshong shnong, 3 hajar tam ki nongthep vote bad kumba long mynta ka shnong kaba donkam shibun ki lad jingïarap na ka sorkar naduh ki surok shnong, ka umbam umdih, ka jingshngaiñ haka jingleit rep nalor kiwei kiwei de.
U kongsan bah Prestone Tynsong haba ai jingkren ula ong ka sorkar kala pyrkhat janai ïa ka rukom treikam ban pyntuid kyrhai ïaka roi ka par ha kylleng sawdong jong ka jylla. Shuh shuh u ong ka jingangnud jong ka sorkar ka long ban ïaleh katba lah ban pynduh pyndam noh ïa ki kam sniew kiba bun jait hapoh ka jingïalam ka DGP bad buh ki pulit kiba duh thiah duh dem ban pyndep ïalaka kamram kaba lah ruh ban shim por da ki snem ban ïoh kem ïa kiba donkti.
Kum ka lad ban ai mynsiem ïa ki pulit ka jylla ka sorkar ka kyntu jur ïa ki nongshnong shnong ban ai ka jingkyrshan lem da kaba ïatreilang bad ki pulit ha kiba bun ki liang, la ong u Prestone Tynsong.
Ula kren halor ka jingjia ha Sohra ka dei ka History ïa ki Pulit jong ka jylla kila la trei shitom ban ïoh kem ïa ki runar, wat na ka liang ki nongshna phlim napoh ka Ri India kila don kiba kwah ban shna phlim ïa kane ka jingjia ha Sohra bad ka long ka burom kaba khraw eh ïa ki pulit ka jylla.
Ha kaba ïadei bad ka Border Outpost ha Mukroh ula pyntip ba ka sorkar kala rai ban shna ha katei ka shnong bad kaba sah mynta ka long ban ïoh ïa ka jaka, lada ka sorkar ka ïoh kloi ïa ka jaka yn sdang noh ban tei ïaka na ka bynta ka jingbit jingbiang jong ki pulit, kumta ula kyntu ïa ka shnong ban don ka jingïatreilang.
La pynphuh pynphieng shuh shuh ïa kane ka sngi da ki jingrwai, ki jingshad tynrai na ki khynnah skul, ïa ka jingïalang la pynïaid da ka Additional Superintendent of Police (DSB) kong Crescency W. Lyngdoh (MPS), katba ïa ki kyntein ai khublei la ïoh na u SP ka District u Jagpal Singh Dhanai (IPS).