Shillong, Nailar 20: U Rev Pastor R.G. Laloo u la pynbna paidbah ba la plie pyrda ïa ka jingrakhe dap ba 50 snem lyngba ki prokram kiba shisnem lynter ïa ka jingshakri paidbah ka seng Khasi Jaiñtia Welfare Association (KJWA) ha ka jingïalang plie kaba la long mynta ka sngi 20/Nailar/2026 ha ïing dorbar ka shnong Mission Compound Shillong.
Haba kren ha kane ka jingïalang kum u kongsan u Rev. R. G Laloo u la ong ba ïa ka seng KJWA la sdang ha u snem 1977 tang hadien san snem ba la ïoh ïa la ka jong ka jylla ba pura, kane ka seng ka dei ka seng treimon sngewbha.
Ka jingthmu jong ka seng ka long ban pynmih ïa ka mynsiem ban shakri bad ban don ïa ka jingkitkhlieh ïa ka jingim bad ki nongseng kiba nyngkong ki kynthup ïa ki rangbah bad ki riew kynthei kiba paw khmat jong katto ka por.
Haba peit ïa ka jingtreikam jong ka seng kaba kila sdang ha kato ka por, hynrei ka jingtrei kam ka dang ïahap tara jur bha bad kane ka juk kaba mynta namar ka KJWA ka la buh hakhmat ban pynsngewthuh ïa ka pule ka puthi lyngba ki jinghikai ki bapher bapher kiba ka seng ka la ai.
Ha kane ka sngi na ka liang jong u pastor u la buh ha khmat jong ka seng ïa ka jingtrei kam ha kaba nangne sha khmat ba kan phai khmat sha ki khun samla bad ki khynnah namar kine ki samla kane ka juk mynta ki im ha ka jingduh jingkyrmen, kane ka dei ka bynta kaba kongsan kaba kum ka seng ka dei ban leh ym tang ka KJWA hynrei da baroh kiba don ha ki kynhun bapher bapher.
Ha kane ka jingplie pyrda ïa ka jingsdang ban rakhe ïa ka jingdap 50 snem jong ka seng la phiah ha ki ar bynta, ïa ka bynta ba nyngkong ka long ban plie ïa ka jingrakhe bad ka bynta kaba ar ka long ka jingïamir jingmut, ïa ka jingkren pdiang sngewbha la kren da u Dr. D. K. B Mukhim bad ka jingkren ai khublei da u Dr. A.W Rani, ha ka jingïadonlang ki riew rangbah bad ki longkmie bad kiwei kiwei.
