Ka jingkam ka KSU ba don kiba shimkabu ha ka jingïaid rally kam ïahap satia bad ki sakhi satar ba la ïoh: DC EKHD

By Mawphor Editor On Aug 21, 2026

Shillong, Nailar 20: Hadien ba la mih ka huri hura ha ka jingïaid bike rally jong ka seng KSU ha ka sngi Balang, u Deputy Commissioner ka East Khasi Hills Abhilash Baranwal ha ka sngi Palei ula ong ba ki jingkam jong ka KSU ba ki don ki runar bad ki riewshimkabu kiba la hukum ne kiba la kurup pynïaid (hijack) ïa ka rally thuk thuk ban pynjah burom ïa ka seng, kam don jingïahab satia bad ki sakhi satar ba la ïoh bad ïohi.
Haba phai bad kren ïa ki jingpynksan ka KSU, u Baranwal ula ong ba kano kano ka jingpyni nia ka dei kaba hap ban bishar pyrshah ïa ka sakhi kiba don bad ka ophis. Ha kane ka jingjia, la kumno kumno ruh ha kane ka rally, kila don bun ki briew kiba rah ïa ki dieng, ki narrod, ki nombor plate ba la tap bad ba kah durkhmat.
Na ka liang jong u, u la ong ba ka jingïaid ki kam thombor ka kdew pyrshah ïa ki jingkam ba dei ki jingleh jong ki briew ba nabar ne ki riew shim kabu.
U DC u la bynrap da kaba ong, “Halor kane kam dei tang kawei ne artylli ki jingjia ba jia ha shilynter ka jingïaid rally, ki la don bun tylli ki jingjia. Lada phi bishar ïa kine ki jingjia, ngim tharai ba ki jingpynksan nia ki ïahap bad ki sakhi.”
Shuh shuh u Deputy Commissioner ula ong ba kane ka kam ka dang don hapdeng ka jingtohkit bad kan shong ha ka Ïingkashari ban rai la ka dei ka jingïasylla lane kaba da thmu lypa ban leh ïa ki kam.
U la ong, “Ka dei ka kam ba hap tohkit bad khatduh ïa ka ejahar lah dep ban ujor. La ka dei kaba thmu lypa ne ba don ki nongsylla, la ka dei ba don kiba kynshoit lane don ki riew bymman kiba pyrshang ban hijack ïa ka rally ka dei kaei kaei ka ban sa mih ha ka jingtohkit bad ka kam jong ka Ïingkashari ban rai.”
Ula bynrap “Hynrei, ia mynta, namar kane ka jingjia ka jia tang hynnin ka sngi, ngi hap ban shong bishar ia kino kino ki jingpyni nia pyrshah ia ki sakhi ba don bad ngi bad ki sakhi ki don ia baroh ban iohi. Kila mih ha ki social media, ha ki lad pathai khubor baroh”.
“Ka shong ha ka rukom pyrkhat jong baroh la ka dei kaba da thmu lypa ne la ki dei ki dkhot jong ka seng lane don kiwei ki riew bymman kiba kwah ban shim kabu ia kane ka rally thuk thuk” ong u Baranwal.