Plie u myntri sorkar ïa ki jaka leit shabar ba kyrpang ki Kynthei ha ki skul sorkar ka thaiñ Ri Bhoi

Nongpoh, Lber 31: Kum u myntri sorkar ka jylla ba dei peit ïa ka tnat Animal Husbandry bad Veterinary ka sorkar jylla, u Alexander Laloo Hek kum u kongsan u la leit ban plie ïa ki jaka leit shabar (Toilet) ba la shna kyrpang na ka bynta ki khynnah kynthei ha skul Umden Umroi RMSA Secondary School ha Ri-Bhoi District.
Shi bynta ban phai khmat ban kyntiew ïa ka pule ka puthi, ïa kane ka projek ne ki kam pynroi la pyntreikam da ka Indus Towers Limited, kawei na ki kompeni ba heh tam ha ka pyrthei, ha ka jingïatreilang bad ka Northeast Centre for Equity Action on Integrated Development (NEAID). Kane ka Indus Towers Limited ka dei ruh ka kynhun kaba pyntreikam ïa kine ki projek ha kaba la lah ban tei ïa kine ki jaka lei shabar ha ki 3 tylli ki skul ba hap ha ki bynta ka Ri Bhoi bad ruh ha East Khasi Hills.
Haba ïaroh ïa ka Swachh Bharat Abhiyan ka Sorkar India, ïa ka jingbei tyngka ban tei ïa kum kine ki projek ha katei ka skul Umden Umroi RMSA Secondary School, u Bah A.L hek kum u Myntri sorkar u la ai ka jingkyrkhu kyrdoh ryngkat ka jingdonlang u MLA ka Umroi konstitwensi, U Bah Damanbait Lamare, Special Project Director ka SSA; Swapnil Tembe bad u Rajender Singh Gurung, Circle CEO-NESA ka Indus Towers Ltd.
Kane ka dei shi bynta na ka Corporate Social Responsibility prokram, ba pyntreikam da ka Indus Towers. Ka jingthmu ka long ban pynbiang ïa ki jaka leit shabar kaba shngaiñ bad kaba khuid, da kaba pynbha ïa ka koit ka khiah bad ka jingkhuid jingsuba, ban ioh ïa ka mariang kaba khuid ïa ki khynnah skul ba kin dang kiew ha ka liang ka pule ka puthi.
U Myntri ka tnat Animal Husbandry bad Veterinary, U Bah Alexander Laloo Hek, u la pynpaw, “Kane ka jingthmu ka dei ka sienjam kaba kongsan ban kyntiew ïa ka jingkhuid jingsuba, ka burom, bad ka jingbha jingmiat jong ki khun kynthei jong ngi, kiba ju ïakynduh jingeh namar ka jingbym biang ki jaka pynkhuid ha ki skul. Nga ïaroh ïa ka Indus Towers na ka bynta ka jingpyrshang ba dei ban ai jingïaroh ha kaba pynlong ïa kane kaba lah bad pynshlur ïa ka jingïatreilang kaba dang ïaid shakhmat ban pynïar ïa kum kine ki jingpynbha sha kiwei pat ki thaiñ jong ka jylla Meghalaya.”
U Rajender Singh Gurung, Circle Chief Executive Officer (CEO) jong ka Indus Towers Limited u la pynpaw ïa ka jingshimkhia jong ka kompeni ban kyntiew ïa ka roi ka par. “Lyngba ka prokram CSR ba kongsan jong ka Indus Towers ‘Pragati’, ngi thmu ban weng ïa ki jingduna ba kongsan ha ki jingtei bad ban pynkupbor ïa ki shnong ki thaw. Nalor tang ki jingtei, kane ka jingthmu ka wad ban pynkupbor ïa ki samla pule da ka burom, ka jingshaniah, bad ka jaka kaba shngaiñ. Da kaba pynthikna ïa ka mariang kaba khuid bad kaba shngaiñ, ngi ïaleh ban pynroi ïa ka jingsngewrit hapdeng ki samla pule katba ngi dang tei ïa ka rukom sumar kaba pura hapoh ki skul, kaba ai jingmyntoi ha kaba kut ïa ka imlang sahlang baroh kawei.”
Kum ban pynpaw, kane ka projek ka ïadei bad ar tylli ki bynta kiba kongsan jong ka jingpule jong ki khynnah kynthei – ki jingtei bad ka jingpynsngewthuh (infrastructure and awareness). Nalor ka jingshna ïa ki paiñkhana kiba khuid, ka prokram ka kynthup ïa ki jinghikai kiba bniah shaphang ka jingkhuid jingsuba ha ka por ba wan bnai, kiba la shna khnang ban pynpra ïa ki jingkhang ha ka imlang sahlang bad ban pynkupbor ïa ki samla pule da ki jingtip kiba kongsan shaphang ka koit ka khiah.