Nongstoiñ, Lber 31: Ka pyntha Umyiap ka dei ka pyntha rep kaba heh tam hapoh ka jylla ha kaba ka jingjrong jong katei ka pyntha ka don kumba hynñiew haduh phra kilomitar bad ka pyngkiang pat ka don kumba shi kilomitar tam.
Sawdong jong katei ka pyntha rep ki don palat ar phew wei tylli ki shnong bad katei ka pyntha rep ka long kum ka pliang ja jong ki paitbah jong kitei ki shnong. Katei ka pyntha rep ka dei kaba ki paitbah kim ju pynlait thylli ha baroh shi snem lynter hynrei ki jingthung jingtep ki jyrngam sah naduh bas dang ka snem haduh ban da kut ka snem.
Ha kine ki sngi ka la dei ka aïom ba ki nongrep ki la sdang ban kheit ïa u motor u ba ki sdang ban rep naduh u bnai Kyllalyngkot bad hamar ba sdang ka aïom kheit motor, u nongthoh khubor u la hiar sha katei ka jaka ban ban ïakynduh ïa ki nongrep bad ban wad jingtip shaphang ka rep ka riang bad kumno ki pynïaid ïew ïa ki mar rep jong ki.
Naduh ki longkmie, ki rangbah bad ki khynnah ki minot thop bad ki trei shitom ban lum ban lang ban kheit ban ot ïa kaba ki mar rep ba ki la rep bad trei shitom. Kaba sngew tynnad ka long ba la lap ba ki kmie ki kpa ki ïalam ruh ïa ki khun ki kti jong ki sha kitei ki jaka rep ban hikai ïa ki kumno ban rep ban riang ban trei ban ktah bad ban ym pynsep ei ïa ka por ha ki kam kai ki bym lar kam.
Nalor kata la lap ruh ba ki nongrep ha katei ka thaiñ ki long kiba smat ba sting kiba trei shitom bad kiba sngewthuh ba ka rep ka riang ka dei ka kam kaba don burom bad ba ki nongrep ki dei ki païa kiba khlaiñ tam ban kyntiew ïa ka ïoh ka kot, ka kamai kajih bad ka roi ka par hapoh ka jylla.
Ki longkmie ki la ong ba mynta u snem ka duna bha namar ba ha ka por ba u jingthung u dang sdang ban phuh syntiew, ka don ka jingtap lyoh khyndew kumba lai miet ei ei bad ka la ktah jur bha ïa ka jing san bad ka jingsoh jong u motor.
Ki la ong ruh ba ka jing ktah jong ka mariang kum ka jingïap ïong,bam khñiang bad kiwei kiwei ka la sdang naduh u snem 2023 haduh mynta bad ki la pyrshang ban leit shim dawai na ki ophis sorkar kiba peit ïa ka rep ka riang, hynrei ki shu ïarap malu mala. La ong ruh ba wat la ka don ka jingshah ktah ha ka mariang hynrei ki dang lah hi ban pynmih ïa ka jinglut, ka bai bylla bad kiwei kiwei.
Kitei ki nongrep ki la ong ruh ba ki jingthung kum u motor, kajor bad kiwei kiwei ki jingthung ba ki rep ha ka por tlang ki don kam shibun bah ka um bad ka la I donkam eh ba ki bor ba halor kin phai khmat lem sha ki nongrep ha katei ka thaiñ, da kaba pynpoi um lyngba ki pipe haman la ki jaka rep bad lada lah ban leh kumta ka ïoh ka kot jong ki nongrep kan kiew na ka por sha ka por.
