Shillong, Nailar 09: U Myntri Rangbah ka jylla u Conrad K Sangma ha ka sngi Thohdieng u la plie ïa ka AI technology based company iMerit ha Shillong IT Park, Umsawli ha ka jingïadonlang u Radha Basu, Founder bad CEO ka iMerit.
Haba ong ba ka Shillong ka dei ka nongbah kaba lah ban buh ïa ki IT company, u Myntri Rangbah u la ong, “Ka sorkar ka la sdang ban tuklar ban thaw ïa ka ecosystem ban ai ki jingshakri lyngba ka IT. Ka sorkar ka pyntreikam ïa ki project ban pynthikna ba ka jingpynïoh ïa ka internet ha kylleng ka jylla kan long kaba sted”.
Haba kren shaphang ka jingbuh jingthoh ba la sdang da ka sorkar mynta lyngba ka internet kaba la long ka bynta kaba kongsan bha u la ong, “Ka jingbuh jingthoh bad jingkheiñ ka la long kawei na ki lad ba ka sorkar ka la pyndonkam ban shim ïa ki rai kiba kongsan bad la lah ban leh khambun bha ïa kane wat hapdeng ka jingdon la u pud”.
Haba pyntip ba ka sorkar ka la pyndonkam ïa ka technology ha ki lad bad ki kam bapher bapher ban pynbha ïa ki tnat kum ha ka koit ka khiah ban sumar ïa ki longkmie bad ki khynnah, ban khmih ïa ka rep ka riang bad kiwei kiwei kiba ka jylla ka don. “Ïa ka bynta jong ka technology la pyndonkam ban shim ïa ki rai kiba kloi bad ngi kum ka sorkar ngi pynshlur ïa ki company ban wan theh pisa bad ban kyntiew ïa ka jylla”.
“Ka Technology ka la long u budlum na ka bynta ka imlang sahlang ban lah ban pyntrei bha ïa ki kam bad da kane ka sorkar ka la lah ban trei khlem shong thait ban ai ki lad jingtip bad ban pyndonkam ïa ka technology na ka bynta ka jingbha bad ïaid beit ki kam ka sorkar”, u la bynrap.
U la pynshlur ruh ïa ki samla ban shim ïa kane ka kabu jong ka jingdon ki IT company, kiba la wan sha Shillong. “iMerit ka dei ka international brand bad kum ka sorkar ngi khmih lynti ïa ki samla bad ki nongshong shnong ba kin pynpaw ïalade da ki jingtrei shitom ka jingaiti bad ka jingtreibha.”
Ka iMerit ka dei ka AI Solutions IT Company kaba don haduh 5000+ ki nongtrei ha kylleng ka ri United States, Europe, Bhutan bad India, bad kumba 200 + ngut tam ki nongtrei ha Meghalaya bad na kane kumba 64% ki dei ki kynthei.
