Shillong, Nailar 09: U national secretary ka BJP bad u national spokesperson, uba khmih ruh ïa ka Meghalaya bad Nagaland u Anil K Antony ha ka sngi Thohdieng u la pynbna ban sdang ïa ka jingïalap ‘Har Ghar Tiranga’ napoh ka ophis ka BJP na Shillong. Ka jingïalap, la pynwandur ban pynrung ïa ka jingmut ka jingsarong bad ka jinglong trai hapdeng jong manla ki nongshong shnong jong ka India, kaba dei ruh kaba la sdang da u Myntri Rangbah duh ka ri u Narendra Modi, bad kaba la rung mynta ha ka snem kaba lai ha u 2024. Ha kine ki 2 snem ba la leit ïa ka ‘Har Ghar Tiranga’ Campaign, kaba la thaw ban ïasohlang bad ka Azadi ka Mahotsav ne ka jingrakhe ïa ka jingdap kaba 75 snem ka jingïoh laitluid ka ri, ka la mih kum kawei ka festival kaba heh bha ha kylleng ka ri.
Haba kren ha ka prokram, u Anil K Antony u la ong, “Mynta la slem bha, ka jingïadei jong ngi bad ka Lama Ri. Hynrei kane ka jingthrang u Myntri Rangbah duh ka ri u Narendra Modi, mynta ka la pynkylla dur ïa ka ri ha kane ka synshar paidbah, bad ka la pynthikna ïa ka jingïadei jong manla ki nongshong shnong jong ka ri.”
“Ka ri ka burom ïa baroh kiba ïaleh laitluid ha ka 13 tarik mynta u bnai, ba kynthup ruh ïa u U Tirot Sing, U Kiang Nongbah bad Pa Togan Sangma napdeng kiwei. Lyngba kane ka program, ngi kwah ban phah kane ka khubor sha u Rahul Gandhi uba ïalam ïa ka Congress bad kiwei ki seng ka liang pyrshah. Ngi kyrpad ïa ki paidbah ba kim dei ban long ki sohpdung ha kum kine ki rai ha ka saiñ pyrthei kiba wanrah ki jingïapher. U Myntri Rangbah duh ka ri u la khot ban pynlong ïa ka sabka saath, sabka vikaas khnang ban lah ban kyntiew ïa ka ri ha u snem 2047.”
“Na ka bynta u Myntri Rangbah duh ka ri, kane thaiñ North East ka la ïoh ka jingpynleit jingmut kaba kyrpang bad kumba T. 6 lak klur lah dep ban pynlut ha ki kam pynïasoh bad ki kam pynroi. Ka North East mynta ka la dei ka khyrdop sha ki ri ASEAN. Ngi kyrpad ïa ki nongshong shnong ka North East ban rakhe ïa kane ka sngi laitluid da kaba wah ïa ki lama ka ri ha la ki jong ki ïing ki sem ha ka 15 tarik mynta u bnai,” pynkut u Anil K Antony.
