Shillong, Jymmang, 24: U Myntri Rangbah ka Jylla u Conrad K. Sangma ha ka sngi Baar ha ryngkat ka jingsakhi lang jong u MLA ka Mawryngkneng Constituency u Bah Pynïaid Sing Syiem u la plie paidbah ïa ka Jackfruit Techno Incubation Centre (TIC) kaba don ha Institute of Hotel Management, Mawdiangdiang, Shillong.
Kane ka jaka pdem sohphan ba la pyndonkam katkum ki kor ki bor jong ka buit stad teknoloji ka dei kawei na ki mishon ba la bei da ka Sorkar Jylla ban pyntreikam ïa ka Mission Jackfruit happoh ka jylla. Ka Sorkar kan sa plie ruh sa kawei ka Techno Incubation Centre ha ka College of Community Science, CAU kaba don ha Tura.
Ïa ka Mission Jackfruit la pynbna paidbah ha u snem 2018. Da kaba buh thong ban pyntylllun ïa kane ka projek hapoh san snem, la bynshet pat ha ka Directorate of Food Processing ban pyntreikam ïa kane ka mishon.
Haba kren kum u Kongsan ha ka jingïalang, u Myntri Rangbah u laong ba ki thong treikam jong ka Sorkar ka long ban kyntiew ïa ki shnong nongkyndong bad ïa ki jaka sor bad ba ïarap ruh ïa ki nongrep ban kham kiew ha ka khih ka kamai da kaba pynïaid iew ïa ki mar rep.
“Ïa ka Jackfruit Mission la sdang na ka bynta ban pynsngewthuh ïa ki nongrep ba kin dup lah ban pynmih kham bun ki mar rep bad ban pynkiew ïa ka jingïohnong bad ban ym pynlehnohei haduh T. 500 klur ban shu bret kai. Katba ngim pat lah ban pynïaid iew ïa ki mar, kin shu long lehnohei,” u la ong.
U Myntri Rangbah u la banjur ruh ïa ka jingdonkam ban don ïa ki nongsengkam ha ka rep ka riang kum shi bynta ban pynïasoh ïa ka jingpynïaid iew ïa ki mar rep ba ladep kheit.
Haba pynpaw ba kane ka jingthmu ka long ban pyntreikam ha ka rep ka riang na ka bynta ka jingmyntoi jong ki nongrep, u Myntri Rangbah u la ong ba donkam ban pynbeit ïa ki jingbym ïasngewthuh jingmut khnang ban kynjoh sha ka thong.
“Ngi donkam ban ïatreilang ha kiba bun ki jait kam. Ngim lah ban ailad ba ka jingtreikam kan shu lehnohei khnang ba ki nongrep kin ïoh jingmyntoi,” u la ong.
U Myntri Rangbah u la banjur ba donkam ban pynshlur ban buh ïa ki jingbam ba la pynmih hi na ki kper rep ha ki Restaurant khnang ban pynshlur shuh shuh ïa ki nongrep.
U Bah Pynïaid Syiem haba kren ha kane ka sngi la pynpaw ka jingsngewnguh ïa ki prokram bapher bapher ba la pyntreikam da ka Sorkar na ka bynta ka bha ka miat jong ki nongrep.
U Chairman jong ka Meghalaya Farmers’ (Empowerment) Commission u K.N. Kumar u la ong ba kane jaka pdem sohphan kaba la plie thymmai kan long kum ka Processing Centre ïa u sohphan bad yn sa ai jinghikai ruh sha ki nongrep.
U la bynrap ba kane ka TIC kan long ka shlem ban pynmih ïa ki jingbam bapher bapher na u soh Phan.
