Shillong, Jymmang 24 : U MLA jongka Mawlai Constituency u bah P.T Sawkmie ula ai khublei ïa ka sorkar khamtam ïa ka High Power Committee (HPC) ba la khlieh da u Lamphang bah Metbah Lyngdoh ba ka la rai ban thung da ka jingtohkit na ki IIT na kiwei ki jylla ym na ka IIT Rorkee khnang ban lap ïa ka daw bad ki jingshisha na kaei ka daw ba la twa ka Dome ne tnum pyllun jong ka Assembly kaba la tei halor ka tnum pdeng jong ka ïing dorbar Assembly ba thymmai ha Mawdiangdiang.
“ Nga sngew ba dei ban ai khublei ïa ka sorkar namar ka la rai ban phah tohkit khlem da don kino kino kiba dawa hynrei ka la rai hi da lade ban phah tohkit ban lap ïa ki jingshisha. Hynrei tang kawei nga kwah ban kyntu ïa ka sorkar ba kan sngewbha ban buh por ïa ka kynhun tohkit ban pyndep ïa ka jingtohkit khnang ban ym slem ban ai ïa ka kaiphod ban ïoh ban sdang tei biang ïa katei ka ïing dorbar kaba la buh thong ha ka jingshisha ban pyndep hapoh une u snem. Hooid da kine ki jingjia bad jingpynwit kan long kaba eh ban pyndep hapoh kane ka samoi san snem hynrei wat la katta ruh ban ïoh pyndep noh ha u snem ban wan da ka sorkar ba thymmai” ong u bah Sawkmie.
Kawei pat ka khubor na ka sur ki paidbah ha kaba ïadei bad ka Assembly ka long ba kat kum ka jingïathuh u Executive Engineer (EE) ka PWD (Building) bah Ransom Sutnga ba na ka pisa ba la mang ban tei la dep pyllait 170 klur sha ka kompani, ka jingkylli ka long hato sa tang 57 klur lah mo ban pyndep ïa ka jingtei ïa ka jingtei. Namar kat kum ka tender ba la ai sha ka kompani Rajkiya Nirman Nigam Ltd kaba na Utter Pradesh, ka long 127 klur tyngka bad hadien kane la ïoh jingïarap biang na ka sorkar pdeng lyngba u Lamphang ka ïing Dorbar Thawaiñ Lok Sabha sa 100 klur tyngka. Baroh ka long 227 klur tyngka. Kaba la siew ka long 170 klur tyngka bad kaba sah mynta ka long sa tang 57 klur tyngka. Ka jingkylli na ki paidbah ka long kumno haba tang ïa ka Assembly ym pat dep la pyllait haduh kattei klur tyngka bad ka jingkylli ka long hato lah ban pyndep sa tang 57 klur tyngka nalor ba jia kine ki jingjia.
