Shillong, Jymmang, 24: Ki bor pynïaid jong ka skulbah North Eastern Hill University (NEHU) ha ka sngi Baar ki la pyntip ba ka University Grants Commission (UGC) ka la rai ban pyllait ïa ki Kolej kiba pynïasoh bad ki khyndai tylli ki Central Universities kynthup ruh ïa ka North-Eastern Hill University na ka jylli jong ka CUET (UG) 2022 bad la ailad ïa ki ban ki pynrung klas ïa ki samla pule ha ka Academic Session 2022-23 kumba ju leh ha ki snem ba ladep.
Kane ka rai jong ka UGC ka la wan hadien ka jingphah jingthoh ba la ïoh na ki Central Uiversities kiba don haNorth East bad na ki sorkar jylla jong ka thaiñ Shatei Lammihngi ha kaba ïadei bad ka jingbthah jong ka Ministry of Education, ka Sorkar India lyngba ka jingpynbna No 65-4/2020-CU.II dated May 13, 2022, ba la phah sha u Registrar jong ka North-Eastern Hill University bad sha ki Registrar jong ki phra tylli ki Central University lyngba ka shithi na ka UGC kaba No. F.13-11/2020(CU) dated May 19, 2022.
Ki pynïaid jong ka skulbah NEHU ki la pyntip ba ki Kolej kiba pynïasoh bad ka North-Eastern Hill University kin pynlong ïa ki jingpynrung klas kumba ju leh ha ki snem baladep khlem da pyntreikam ïa ka CUET (UG) 2022 score jong ki nongaplai kiba kwah ban rung klas ha kine ki Kolej tang na ka bynta ka samoi pule jong u snem 2022-23.
Hynrei ki bor pynïaid ka North-Eastern Hill University ki ïai pynshlur ïa ki samla pule kiba ladep pynrung kyrteng na ka bynta ka CUET 2022 ba kin leit thoh ïa kane ka eksamin khnang ba kan jingmyntoi hi ïa ki lada ki kwah ban ïoh jaka pule ha kiwei pat ki Central University kiba don ha ka ri.
Ha kaba ïadei bad ka jingpynrung klas na ka bynta ki Under Graduate Courses ba la pynïaid da ka NEHU hapoh u pud u sam treikam baroh ki jingpynrung klas yn leh lyngba ka CUET lait noh tang ïa ka B.Tech Courses kaba yn donkam ban leh ïa ka JEE Score.
Shuh shuh, ka UGC ka la pynmih ïa ka jingpynbna ïa ka tarik ban pynrung kyrteng na ka bynta ka CUET 2022 ïa ki Post Graduate Courses.
Ka NEHU kum kawei na ki Central University kan pynrung klas ïa ki samla pule ha ki PG Courses lyngba ka CUET. Na ka bynta kine ki samla pule, la bthah ba ki dei ban pynrung kyrteng na ka bynta ka eksamin CUET 2022.
