– Kyrsoibor Pyrtuh
Ka sien kaba nyngkong kaba nga ïohsngew shaphang ka bamsap kaba la nam da ka bamsap pyllun tnum ïing, ka dei kata ka Teapot Dome Scandal ha Ri America. Ka don kawei ka jaka ha ka Jylla Wyoming ha Ri America kaba don u mawlong uba la oh shrong da ka mariang ha ka dur jong u ketli shet sha bad kumta la nam ïa uta u mawlong da u Teapot Rock ne Teapot Dome bad ha kane ka jaka ka don ruh ka par umphniang kaba heh. Hapdeng ka snem 1921 bad 1922 ha ka por ka jinglong President jong u Warren G Harding, ka la don ka kam bamsap kaba shyrkhei ha ka kam pynmih umphniang na kata ka par. Katkum ka kaiphot jong ka ïingdorbar Thaw Aiñ ne ka Senate la ong, “ ka kot khubor Wall Street Journal ka la pynmih ïa ka report halor ka jingbamsap bad ka jingai syrnot sopsop ïa kawei ka company khaïi umphniang ban kjit bad shalan ïa ka umphniang na katei ka par. U nongmihkhmat jong ka Wyoming u la ujor pyrshah ïa kane ka kam bamsap bad u la buh hakhmat ka ïingdorbar bad kaba la pynlong ïa ka jingtohkit kaba sah nam ha ka history jong ka Ri America. Ha kaba sdang ka Republican Party kaba don ha ka bor, ka dang pyrkhat ba kane ka jingtohkit kan jlan ne shim por bad lehse ki nongtohkit kin sa btai bad kin ym lah ban pyndep, kumta ki la thung ïa uwei u dkhot uba khynnah tam jong ka Senate kum u Chairman jong ka Committee tohkit. Ka jingkylli kaba khraw kaba don hakhmat jong u Chairman bad ka Committee ka long, “Kumno u Myntri Sorkar uba bat ïa ka kyrdan Interior Secretary u khie spah kynsan kynsan? ñiuma, ka jingtohkit ka la long kaba seisoh bad la shem ba u Albert Fall, uba long u Interior Secretary, u la donkti ha ka kam bamsap bad u la shah pynshitom bad set phatok. Kane ka jingtohkit ka la long kaba kongsan namar ka la plielad shuh shuh ïa ka Senate ban tohkit ïa kiba bun kiwei ki kam bamsap ha ki snem kiba hadien”.
Ka Meghalaya wat a ka long ka Jylla kaba rit tam eh, hynrei kam duna pat ha ki kam bamsap-bampong bad ki kam tuh kam thiem ha ki jylli synshar-khadar. Dang shen, ka jingorpait jong ka kynroh ha ka jaka ïeng ki bus (ISBT) kaba dang shu plie shen ha Mawïong bad ka jingtwa jong ka pyllun tnum ïing jong ka ïingdorbar Thaw Aiñ ka Jylla kaba dang tei mynta ha Mawdiang diang ka shat phalang ïa ki kam bamsap, ki kam leh sopsop, ka treikam treijam kaba noh shilliang bad kaba pynmyntoi tang ïa ki paralok ne kiba don ka jingïadei kaba jan bad ki nongsynshar. Mynta ha Meghalaya ban bamsap ka la long ka jingmlien bad kiba bamsap ruh kim don jingïatip lem bad kim sheptieng shuh ban leh kumta. Ngan ym klet ïa ka jinglong kuman jong ki katto katne ki nongsharai Balang bad ki nongïalam jong ki seng saiñ hima kiba kyntait ba ka don ka jingbamsap bad kiba kynteit ïa ki nongïakhih kiba dawa ban pyntreikam ïa ka aiñ pyrshah bamsap, ka Aiñ Lokayukta, ha ka Jylla ha ki snem 2011 haduh 2014. Haduh mynta kine ki juh ki nongsharai Balang kiba kam ba ki dei ki nonghikai ïa ki aiñ blei, pylleiñ pylleiñ ki len ïa ki kam bamsap bad ki ïai bteng ban ïasnoh kti bad ki nongsynshar/nongïalam saiñ hima ban khñoit beiñ ïa ki briew bad pyndonkam bakla ïa ka bor na ka bynta ka jingmyntoi shimet.
Hadien ka jingtwa jong ka pyllun tnum ïing jong ka ïingdorbar Thaw Aiñ ka Jylla nga don shibun ki jingkylli kiba ngan buh hakhmat kumne: (i) mar mar hadien ka jingkhyllem u Executive Engineer ka tnat PWD, ka Sorkar Meghalaya u la pynshai halor ki daw kiba pynlong ïa ka pyllun tnum ïing ban khyllem. Hato la pynkup bor ïa u ban jubab ha ka sur bad ka dur ba tang ki Myntri ne ki heh Sorkar kiba halor duh ki lah ban jubab? (ii) ka long kaba phylla ban ïohi ïa ka jingstet shim jingkheiñ bad ban batai ïa ki daw, wat ban phla ruh ba ka tnat PWD ka la mynjur ïa ka plan ne jingdro dur kaba bakla. Hato u Executive Engineer u mut ban ñiew thala ïa ka bor jingtip bad jingshem phang jong ki nongshong shnong? (iii) kumno ka tnat PWD bad u Executive Engineer ki mynjur ïa ka jingoh dur kaba bakla bad balei ba ki shah ban tei ïa ka ïing kaba la dro dur bakla? (iv) hato mynta u Executive Engineer un pynbna paidbah ïa baroh ki jingtei kiba hapoh ka jingpeit jong u, ba ha kano ka rukom la khot tender bad kumno la bate kam sha ki Contractor?
Mynta pat sha ka ophis jong u Shongknor badonburom ka ïingdorbar Thaw Aiñ, ha ka Ri synshar paidbah ka ophis jong u Shongknor bad ka ïingdorbar Thaw Aiñ baroh kawei ka long kaba kyntang bad uno uno ne kano kano kim lah ban kheiñ dewthala ïa ka. Ym kum ka Ri Bilat, ha kaba u/ka Shongknor ka ïingdorbar Thaw Aiñ ki ïehnoh na ka jinglong dkhot ha ka seng saiñ hima ha ka khyllipmat ba ki shah jied kum u/ka Shongknor. Ha Ri India kam don kum kata ka kyndon ne ka jingleh, laitnoh tang u Dr Neelam Sanjiva Reddy uba la ïehnoh ïa ka jinglong dkhot na ka seng saiñhima hadien ba u shah jied kum u Shongknor bad u la ban jur ba u Shongknor u dei ban long uba laitluid. Katba ha Meghalaya, u Shongknor ka ïingdorbar Thaw Aiñ kaba mynta u long ruh u President jong ka Seng saiñhima, ka UDP, kaba long ka Seng synrop jong ka Sorkar MDA. Ha kum kane ka khep ba ka don ka jingkynnoh bamsap ne jingleh sopsop ha kaba tei ïa ka ïingdorbar, ki nongpeit pyrman kin pule ïa ki kam bad jingleh jong u Shongknor katba u dang pyndonkam ïa ka bor, ka iktiar jong u ban tohkit bad pynshitom ïa kiba donkti ha ka jingkynnoh bamsap ha kaba tei ïa ka ophis jong u bad ïa ka Temple jong ka Synshar Paidbah.
U Shongknor u la pynpaw ïa kaba dei ban pynpaw ba u sngewkyndit bad shaïong halor ka jingtwa jong ka pyllun tnum ïing bad u la shim kyrkieh ïa ka kam bad phah sha ka High Powered Committee ban thew, ban wad bad ban ai ka kaiphot. Khlem ka jingthmu ban pynthoh bria, Shongknor ba donburom nga buh hakhmat jong phi ïa kane ka jingkylli, kum u President jong ka Seng saiñhima kaba pynlong ruh ïa kane ka Sorkar mynta, hato phi lah mo ban lait na ki jingshah tan shane bad shatai bad ai ka jingbishar ka bym lah shilliang, lada jia ba phi shem ba ka don shisha ka jingbamsap kaba lehse ki Myntri jong ka Sorkar bad kiwei ki ïadon kti lang? Ym dei ba ñiewpoh ïa ka bor bad iktiar jong u Shongknor, hynrei kum ki nongshong shnong ngi dawa jur na u Lokayukta ban pynstet ïa ka jingtohkit halor ka jingujor jong i Kong Angela Rngad bad kiwei kiba la ujor pyrshah ïa ka jingorpait ka jaka ïeng bus ISBT, ki jingtrei torti ïa ki jingkieng, ki surok bad kiwei de ki kam bamsap. Ban mudui bad shim jingbishar halor ka jingtwa ka pyllun tnum ïing ka ïingdorbar ka Jylla bad ban sdang ïa ka jingtohkit mardor.
Ha Meghalaya, ym dei tang ka bamsap kaba jyllei, hynrei kaba kham shyrkhei eh ka dei ka jingnoh shilliang bad jingleh shilliang khmat ha ka ai kam ai jam. Tang kiba ha-ïing ne ki paralok ne ki seng kiba don ka jingïadei kaba jan bad ki nongsynshar ne nongmihkhmat kiba ïohlut ïa ki kam ki jam ha ka Jylla. La paw shynna ha ka pyrthei baroh kawei ba ka roi ka par ha kane ka juk mynta ne juk neo liberal ka long kaba lah shilliang bad ha ka kyrteng ka roi ka par ka jingbamsap ka suhthied bad jyllei ha man la ki bynta jong ka jingim. Lada ym ai bai sha ne pynkham ne ai bhah ïa kiba don ha ka bor, yn ym lah ban ïohkam lymne pyntrei ïa ki kam ki jam ne kam khaïi-pateng. Ym kum ki Ri kiba la roi, kumba ka paw ha ka Case bamsap kaba la kdew shakhmat kaba la jia ha Ri America ha kaba u Interior Secretary ka Ri America u la shah bishar bad shah pynshitom, katba ha Meghalaya pat ym shym la lah ban bishar bad pynshitom ïa ki heh sorkar lymne ki nongsynshar ne nongmihkhmat kiba donkti ha ki kam bamsap ha ki phew snem kiba la leit noh.
Lyngba kane ka jingthoh nga kyntu bad khot lang ïa baroh ki nongshong shnong bad ki para ri kiba ngeit ha ka nongrim ban kamai ïa ka hok bad bam na ka umsyep, hato ngin shah ba ka bamsap bad ka jingleh shilliang khmat kan pyntroiñ ïa ka nongrim tipbriew tipblei? Hato ka jingïoh la ka jong ka Jylla ka long kaba tat dor haduh katta? Ba yn shu pynkylla ïa ka sha ka tnum ïing ne ka kut jong ka jingbamsap bad jingleh sop sop? Ka kamram bad jingkitkhlieh kaba khraw ka don hakhmat jong ngi ban pyndam shisyndon ïa ka puriskam kai ba kiba don ha ka bor ki lah ban leh katba ki mon bad tang kiba don spah ki lah bad don hok ban long ki nongmihkhmat ne nongsynshar. Ngi dei ban khang lynti shi syndon ïa ka jingrhah bor jong ki. To ngin sdang na ka elekshon bad ka elekshon 2023 kam jngai shuh na ngi, kumta ki don shibun ki heh sorkar kiba dang don ha ka kam bad ki ban sa shongthait shen ne kiwei ruh ki ban sa shim Voluntary Pension, kiba don jingthmu ban aireng ha ka elekshon 2023. Kine ki la pynkhreh shaid shaid, watla ki dang don ha ka kam Sorkar ruh bad kim salia ban pynkheiñ ïa ki aiñ ne kyndon. Ki don lei lei kiba nud ban pynikhmut-pynikhmat ha ki rynsan jingïalang jong ki seng saiñhima bad ruh kiba thaw rynsan lyngba ki tnat Sorkar ba ki bat khnang ban pynpaw pynthei ïalade.
Shuh shuh, ki heh sorkar kiba dang bat ïa ki kam sorkar bad kiba la thmu ban ïeng elekshon khlem artatien ki pyndonkam bakla ïa ka bor ne kyrdan ba ki bat ban pynthame ne pynbieij ïa ki briew ban kyrshan ne ïarap ïa ki ha ka elekshon. Kum ka nuksa, ki thung kam, ki ai kam contract bad kumta ter ter. Namarkata ka daw, ka bamsap bampong ka la sdang lypa naduh ka por elekshon namar ha India ne Meghalaya ngim don ïa ki kyndon aiñ ha ka Riti Synshar kiba tehlakam ba ki heh Sorkar kim lah ban ïeng ïa ki elekshon MLA/MP/MDC mar mar tang hadien ba ki shongthait na ka kam.
Ha kiwei ki Ri ki heh Sorkar ki lah ban ïeng elekshon ar ne lai snem hadien ba ki la shongthait na ka kam. ñiuma, watla ha ka Jylla ngim don ïa kita ki kyndon ne Aiñ, hynrei ki paidbah nongjied ki don ïa ka bor ban hikai bad ban ym jied ïa ki khnang ban ïada na ki kam bamsap kiba lah ban jia hadien.
Paralok, to ngin pyneh rngiew ïalade bad ngin ïeng bad ïakhun pyrshah ïa ka bamsap, ka leh shilliang khmat bad ruh ïa ka jingkam trai jong ki katto katne ki longïing ïa ka kam synshar bad kam saiñhima sima.
