Shillong, Jymmang, 24: Ka Trinamool Congress (TMC) ka la teipop ïa ka Sokar Meghalaya Democratic Alliance (MDA) halor ka jingsahdien ki jingtei ba kongsan hapoh ka jylla na ka daw ka jingïashrut hapdeng ki paralok seng saiñpyrthei
kiba ïatreilang hapoh ka Sorkar.
“Ka jingbym ïasngewthuh jingmut kaba la slem hapdeng ki paralok kiba ïatreilang hapoh ka kynhun MDA ka la nang paw pyrthei bad ka la nang paw shai,” ong ka TMC ha u kyrwoh ba la phah ha ka sngi Baar.
“Ka ïashrut hapoh ka la paw pyrthei. Ha kum kane ka rukom treikam, ba ka Sorkar Pdeng ka la shim kabu na ka bynta ka khusnam ba ka WHO ka la pynkup ïa ki nongtrei Asha, katba ha Meghalaya ka Sorkar MDA ka la pynlong ïa ka jingim jong ki nongtrei Asha kum ka dujok,” la kynthoh ka TMC.
Ka TMC kaba shong ha ka Liang Pyrshah ka la kynthoh ruh ba ka Sorkar MDA ka la shu iehbeiñ ïa ki nongtrei Asha.
Haba pynpaw ïa ka jinglong jingman jong ka ICDS Centre ha Ladmawreng, East Khasi Hills bad dawa ïa ka Sorkar ban phaikhmat lem sha ka jingeh kaba ki Asha ki ïakynduh, ka TMC Meghalaya ha ka rynsan Tweeter ka la ong, “katba ka Sorkar MDA ka dang ïashrut hapoh, ki jingtrei hapoh ka jylla ki la shah iehbeiñ. Ka ASHA ICDS Centre ha Ladmawreng ka la jot rathai bad ym long shuh ban pyntreikam. Ki nongtrei Asha ha kylleng ka jylla ki la ïakhih khnang ba ka Sorkar kan phaikmat. @SangmaConrad, ka la por ka ladei ban kyndit bynriew!”
Ka TMC ka la kynnoh shuh shuh ba ka jingbym pyllait ïa ka pisa na ka bynta u snem 2018-2019, ka Sorkar MDA ka la phiel ban siew tista sha ki nongtrei Asha, kat haduh ba kim banse ban pynlong da ka jingsangeh treikam kaba khlem pud sngi ha baroh kawei ka jylla Meghalaya. Sa shisien, ha u Lber, 2022, da ki hajar ngut ki nongtrei Asha ki la mih sha surok ban ïakhih pyrshah ïa ka Sorkar Jylla halor ka jingbym lah ban pyllait ïa ka bainong kaba la sangeh naduh u snem 2020.
“Hapoh ka jingsynshar jong ka Sorkar MDA kaba ïashrut hapoh hapoh, baroh ki nongtrei hapoh ka jylla ki ïakynduh jingeh. Na ka jingbym lah ban pynbha ïa ka rukom siew bainong bad ka jingbym lah ban siew ka bainong ba la shu pynsahteng, ki sngi badum ki la nang tap ïa ki nonghikai bad ïa ki Asha,” la kynthoh ka TMC.
