Nongpoh, Jymmang 30: Ka jingangnud ki paidbah ki Hynniew tylli ki shnong kiba don ha ka thaiñ Umktieh, ban ïoh ïa ka jaka sumar kaba biang na bynta ki paidbah, ka la wan ban urlong bad kata ka dei hadien ba mynta ka sngi, u Damanbait Lamare, MLA Umroi, u la leit ban plie paidbah ïa ka Health Sub Centre, kaba la tei hapoh ka shnong Umktieh, Ri Bhoi.
Haba plie ïa katei ka Health Sub Centre, nalor ka jingdon u MLA, la sakhi ruh da ka jingdon u Abhilash Baranwal, Deputy Commissioner ka Ri Bhoi, ka Dr. A Kharduid, DMHO Ri Bhoi, u Bah Dius Jyrwa, Chairman Kynhun Dorbar Shnong Umktieh Pyllun, bad kiwei ki nongtrei ka koit ka khiah bad ki riew Rangbah jong katei ka thain.
Ki shnong kiba don ha ka thaiñ Umktieh bad ki ban sa ïoh jingmyntoi na katei ka jaka sumar, ki kynthup ïa ka shnong Umktieh Nongshilliang, Umktieh Pdeng, Umktieh Mawkhim, Umktieh Lawsaitsniang, Umsawriang, Nonglum bad ka shnong Umtangling, ha kaba lyngba katei ka Health Sub Centre, ki paidbah kin sa ïoh ïa ka jingshah sumar bad khamtam eh na bynta ki longkmie bad ki khyllung rit.
Ïa katei ka Sub Centre, la tei ha ka jinglut kaba la kot sha ka T. 55 lak tam, ïa kaba la shna bad pynwandur bha da ka Umktieh VHC.
Haba ai jingkren ha katei ka sngi, u Bah Damanbait Lamare kum u MLA ka thaiñ, u la kyrpad ïa ki nongtrei, ki ban sa trei hapoh katei ka Sub Centre, ba ki dei ban trei bha bad ym dei ban mih kano kano ka jingshah kynthoh halor ka jingtorti ka rukom treikam ha Umktieh Sub Centre, khnang ba katei ka Sub Centre, kan da long shisha ka ban ai jingmyntoi ïa ki paidbah jong katei ka thain.
U la kyntu ruh ïa ki paidbah kiba leit ban shah sumar hapoh katei ka Sub Centre, ba ki dei ban sumar bad lehkhuid bha, khnang ba katei ka jaka ai jingsumar, kan long kaba neh slem bad ba kan ïoh ruh ïa kata ka nam ka burom, ba kan long kum kawei na ki Sub Centre, kaba biang tam, la ka long na Umroi Constituency, hapoh ka District bad ha ka jylla hi baroh kawei.
