Plie u Ma Kyrmen ïa ka Ranikor Beach Festival 2024 ba ar sngi ha Pamdaba, Ranikor
Mawkyrwat, K’lyngkot 19: Kum shibynta ban kyntiew ïa ka kam jngohkai pyrthei hapoh ka South West Khasi Hills District, ka Officer Club jong ka South West Khasi Hills District ba la kyrshan da ka Tourism Department, ka Arts & Culture bad ka Sports & Youth Affairs Department ki la ïoh ban pynlong ïa ka Ranikor Beach Festival 2024 hapoh Pamdaba, Ranikor, South West Khasi Hills District ha kaba u Ma Kyrmen Shylla, Myntri ba dei peit ïa ka tnad Revenue & Disaster jong ka Sorkar Meghalaya u la long kum u kongsan.
Lah ban kdew ba kane ka tamasa lehkmen ka dei kaba neh ba ar sngi lynter kata ha ka 19 bad 20 tarik u Kyllalyngkot, 2024 ha kaba kin sa don shibun ki prokram lehkmen ha ki bynta bapher bapher naduh ka put ka tem, ka rwai ka siaw, ki jingshad tynrai naduh ki Khasi, Garo, Lyngngam, Hajong, Bengali bad kiwei de ki prokram jingïalehkai ba la pynïaid da ka ophis u District Sports Officer, South West Khasi Hills District.
U Ma Kyrmen Shylla, Myntri ba dei peit ïa ka tnad Revenue & Disaster Management Department jong ka Sorkar Meghalaya ha ka jingkren jong u u la ia ka jingïaroh kaba kyrpad halor ka jingshimkhia bad jingkitkhlieh jong u bah Pius Marweiñ, MLA ka Ranikor Constituency, u Deputy Commissioner, bad baroh ki ophisar jong kit and treikam bapher bapher ban pynwan dur ïa kane ka tamasa lehkmen kaba dei ha ka wat ba nyngkong hadien ki kyndai snem. Ha kajuh ka por u la pashad ruh katto katne ki mat ba kongsan kiba don hapoh lada pynlong ïa kum kine ki jait jinglehkmen ha kaba kawei ka long ba ka dei ban wanrah ka jingpynjan ha kaba ïa dei bad ka kam jngohkai pyrthei bad ban rah ruh ïa ki samla ba kin lah ban ïashimbynta ha ki rynsan bapher bapher.
U Ma Kyrmen Shylla ha ka jingkren jong u u la wanrah ruh ba hadien ba ka National Green Tribunal (NGT) ka la khang ïa ka jingtih-diewïong hapoh ka Jylla Meghalaya, kiba bun ki paidbah ha kine ki sngi ki la sdang phai khmat noh ha ki kam ban kyntiew ïa ka kam jngohkai pyrthei bad kiwei de ki kam ki ban ai jingmyntoi. Kumta haba kren halor kane ka mat, u kdew ba lyngba ka jingdon ki jaka jngohkai pyrthei ki lah ban pynïoh-noh ïa ki trai shnong bad ka lah ruh ban wanrah ka jingpynïoh kam ïa ki khun samla.
“Ban pynurlong ïa ki jingthmu kiba bun ha kaba ïa dei bad ka kam jngohkai, ki paidbah nongshong shnong ki dei ban don ka mynsiem jong ka jingpdiang sngewbha bad ba kylluid mynsiem ïa ki nongwan kai, ymtang ïa kiba briew la jong hynrei wat ïa ki briew na kiwei de ki jaka ruh”, ong u Ma Kyrmen. Kumta u kyrmen ba lyngba kane ka tamasa ba la pynlong mynta ka sngi kan sa long kawei na tamasa ban wanrah jingmyntoi ïa ka ban sa wan.
Ha kine ki ar sngi, kan don ka Live DJ, Beach Queen Contest, Dance Troupe (The Bellas Dance Crew), Fashion Show, kunthup ruh ïa ki jingïalehkai kum ka Mawpoiñ, Beach Volleyball, Camping, Tambola, tan tyllai, ki jingïalehkai ki khynnah, ka Zip lining bad kiwei kiwei.
Shuh shuh ha kane ka prokram, ka ophis jong u General Manager, District Commerce and Industries Centre, South West Khasi Hills District ka la pynlong ruh ïa ka 8th District Level Industrial Exhibition 2024 ha kaba shibun ki nongseng ki kam la-jong (local entrepreneurs) bad ki units na kylleng ki shnong jong ka South West Khasi Hills District ki la ïashimbynta ban ban pyni ïa ki jait jingbam bad ki jingdih, ki jingshna kti, ki jaiñ ki nep bad kiwei de ki tiar.
Hadien kata, u Ma Kyrmen Shylla, bad MLA ryngkat ka jingsynranlang kiwei de ki ophisar ki la ïoh ban sam ïa k khusnam nongjop kiba la ïashimbynta ha ka Mawpoiñ ha kaba ka kynhun Syiem ka la jop na ka liang ki kynthei bad ka Never Give Up ka la long ka nongjop na ka liang ki shynrang.
Kiba ïadonlang ha kane ka sngi ki long u bah L.T. Tariang, MCS, Additional Deputy Commissioner, South West Khasi Hills District, ka kong Y. R. Mawlong, MCS, Additional Deputy Commissioner, South West Khasi Hills District, u bah L. Kynjing, Sub- Divisional Officer, Ranikor Civil Sub- Division, u Superintendent jong ki pulit u bah G.D. Kharwanlang, MPS bad kiwei de.