Nongpoh, Jymmang 21: U Deputy Commissioner ka Ri-Bhoi District u Abhilash Baranwal kum u kongsan mynta ka sngi u la plie paidbah ïa kawei ka prokram ban ai jinghikai halor ka jingpoi bnai ki kynthei ba kumno ki khynnah kynthei haki skul kin tip shaphang ka jingpoi bnai na ka bynta ka jingkoit jingkhiah, khamtam ban ai jinghikai ruh ban pyndonkam da ki jingsop poi bnai kiba lah ban pyndonkam biang khlem da bret namar bun ki longiing baduk kim kot bor ban thied bad pynbiang ïa ka jingdonkam ki khun kynthei.
Katei ka prokram ka dei kaba la tip kum ka District Wide School on Menstrual Hygiene Management (MHM) bala pynlong da ka MOSONiE, Project BAALA ryngkat ka bor district jong ka Ri-Bhoi ban ai jinghikai ïa ki nonghikai bad lyngba jong ki yn bteng pat ka jinghikai sha ki khynnah kynthei bad pynbiang ruh da ki jingsop poi bnai kiba lah ban pyndonkam biang sha ki khynnah kynthei haki skul bapher bapher ka Ri-Bhoi District bad ia katei ka jingïalang la pynlong ha ophis jong ka DSEO ha Nongpoh.
Shuh shuh ka thong jong katei ka prokram ka long ruh ban weng ïa ka jingtieng haka por ba poi bnai da kaba pynshlur ruh ïa ki khynnah kynthei ba kin long laitluid ban kren, ban tip ruh ïa ka jinglong ka met ka phad khnang ba ka jingpoi bnai jong ki kan long kaba thikna bad kaba koit ba khiah bad na ka liang ka MOSONiE ka don ruh ka thong ban ïarap ïa palat 8 hajar ngut ki khynnah kynthei bad ki nonghikai haki skul bapher bapher ka them Ri-Bhoi.
Ha katei ka sngi la sakhi ruh da ka jingdonlang ka kong KB Jyrwa District School Education Officer, ka Margaret Liinai Executive Director ka MOSONiE, ki nonghikai lem bad kiwei kiwei. Haba kren ha katei ka sngi u Abhilash Baranwal u la kubur ïa ki jingeh ha ki jaka nongkyndong, ka jinglehraiñ ha kaba ïadei bad ka jingpoi bnai bad ka jingeh ha ka liang ka pisa kaba bun ki longïing ki ïakynduh ha kaba thied ïa ki jingsop poi bnai bad ban jur ruh ba donkam ïa ki khynnah kynthei ban pyndonkam da ki jingsop kiba lah ban pyndonkam biang bad ka jinghikai kaba biang ban pynsngewthuh paidbah.
