Shillong, Jymmang, 21: Ka Dorbar Shnong Nongspung ha ka sngi Balang ka la aiti da ka dorkhas ha u Myntri ka Sorkar Jylla uba khmih ïa ka tnat Jngohkai Pyrthei Bah Paul Lyngdoh da ka jingkyrpad ban mang pisa na ka bynta ban pynlong jaka jngohkai pyrthei ïa ka Mawsangri.
Ïa kane ka kynhun la lamkhmat da u MLA ka Mawphlang u Bah Mathew Beyondstar Kurbah kynthup ruh u Acting Chief jong ka Hima Nongspung Bah Kyntiewborlang Syiemlieh bad u Sordar Shnong u Bah John Worth Born Kharmyndai.
Ha ka jingïakren bad ki lad pathai khubor u Bah Mathew Kurbah u la ong ba ha ka jingïakren bad u Myntri ka tnat Jngohkai Pyrthei, ki nongïalam shnong ki la pynsngew ïa ka jingdonkam ban pynneh pynsah bad ban kyntiew ïa ka Mawsangri, kaba long ka jaka jngohkai pyrthei kaba ithiang ka ban khring ïa ki jaka nongjngohkai na kylleng.
U la ïathuh ba ka Mawsangri ka don ïa ka khanatang bad la ngeit ba ka dei ka kmie jong u Kyllang bad u Symper.
“Na kane ka daw, ka Dorbar Shnong ka ngeit ba ka jingpynkylla ïa ka Mawsangri sha ka jaka jngohkai pyrthei ka long kaba donkam bha khnang ba ka khanapateng kan ïoh jingithuh kumba long u lum Kyllang bad u lum Symper,” u la ong.
