Mawkyrwat, Nohprah 19: U MLA ka Mawkyrwat Constituency, u bah Renikton Lyngdoh Tongkhar u la plie ïa ka Ïingdorbar jong ka shnong Nongbrei-Nongdom, kaba jngai kumba 20 KMs ei ei na Mawkyrwat, South West Khasi Hills District ha ka jingïadonlang ki ophisar jong ka ophis Block Development Office, Mawkyrwat C&RD Block, ki Myntri Shnong lem bad kiwei.
Lah ban kdew ba ïa kane Ïingdorbar la tei ha ka jinglut kaba T. 35.50 lak, na ka skhim MGNREGS ba la ïoh na ka Block ophis, Mawkyrwat T. 33 lakh bad T. 2.50 lakh na ka skhim MLA.
U bah Renikton Lyngdoh Tongkhar haba ai jingkren kum u kongsan ha kane ka sngi u la kyntu ïa ka Block Mawkyrwat ba ka dei ban phai khmat kham bun sha kine ki thaiñ Shiliang Um Rilang namar ba kin kham kiew ha ka ïoh ka kot namar ki paidbah jong kane ka dong ka thaiñ ki im ha ka rep ka riang bad ki kham pynleit jingmut ruh ha ka rep ka riang bad kadei ruh ka thaiñ kaba don jingkyrmen ïa ka rep ka riang.
Shuh shuh u la kyntu ïa ki paidbah nongshong shnong ba kim dei ban buh ka mynsiem tharai sniew ïa ki nongïalam shnong namar kan wanrah shibun ki kynrum kynram hapoh shnong kan ktah ruh ïa ki jingmyntoi ba dei ban ïoh na ka sorkar.
Ka kong Madonna Nongsiej ka Additional Project Officer jong ka Mawkyrwat Block ka kyntu ïa ki paidbah jong ka dong ka thaiñ ba ki dei ban leh khnang ïa u Aadhar namar lada ym don Aadhar shibun ki jingmyntoi na ka sorkar kin sa duh noh.
