Nongpoh, Nohprah 19: Ban dang ïalap sha ki paidbah halor ka thong jong ka Vikasit Bharat Sankalp Yatra kaba dei kaba la wan rah da ka sorkar kmie lyngba u Myntri rangbah duh ka ri, u Narendra Modi, ka Central Bureau of Communication and Broadcasting mynta ka sngi ka la bteng ban pynlong ïa ka prokram pynshai paidbah halor ka jingthmu jong katei ka thong ka sorkar na ka bynta ban wan rah ïa ka jingkylla kaba la buh thong haduh u snem 2047, ba ka ri India kan kynjoh shispah snem ba ka la ioh la ka jong ka jinglaitluid na ka jingsynshar ka ri Nongwei.
Ïa kane ka prorkam ai jinghika halor ka Vikasit Bharat Sankalp Yatra la pynlong da ka ophis jong ka Central Bureau of Communication and Broadcasting, Shillong bad ba la ïa trei lang da ki tnad treikam sorkar bapher bapher na Ri Bhoi district, ba la pynlong ha phylla ka Nongpoh Town Shopping Complex ha Nongpoh. Ha kane ka sngi nalor ki riew paidbah bad ki nongioh jingmyntoi na ki skhim bapher bapher na ka thaiñ sor Nongpoh kiba la wan ban shim bynta, kiwei kiwei kiba la ïa don lang ha kane ka sngi ki kynthup ïa ka Nodal Officer, ka Kong Sofia Dkhar, u Urban Officer ka Nongpoh, u Bah L. Langstieh, ka Capacity Building Specialist ka Nongpoh Town, ka Kong Wansalan Passah bad kiwei kiwei ki ophisar nalor ki doctor kiba la pynlong ïa ka jingeksamin ei ïa ki paidbah kum kawei ruh na ka thong ban pynduhjaid ïa ka jingpang Tuberculosis lyngba ka Pradhan Mantri TB Mukt Bharat Abhiyan.
