Mawkyrwat, Nohprah, 21: U bah Renikton Lyngdoh Tongkhar, Nongmihkhmat jong ka Mawkyrwat Constituency bad u Myntri ka tnad umbam umdih jong ka Sorkar Meghalaya ha ka 20 tarik u Nohprah, 2022 u la ïoh ban plie paidbah ïa ka ïing Dorbar Hall jong ka Shnong Lawblei, South West Khasi Hills District.
Ïa kane ka Dorbar Hall la pyntrei lyngba ka jingïatreilang da ki ar tylli ki skhim kata na ka MGNREGA kaba kot T. 20 lak tyngka bad kumjuh ruh na ka MLA Scheme kaba na ka Special Rural Works Programme (SRWP) ha ka jingmang pisa kaba T. 2.5 lak tyngka.
U bah Renikton haba kren ha ka jingïalang u la ai ka jingïaroh na ka bynta ki paidbah jong ka shnong Lawblei kiba la trei shitom bad pyndonkam hok ïa ka bynta ba ki ki la ïoh na ka skhim 100 sngi bad kumjuh ruh na ka MLA Scheme namar watla ki long ki jingïoh kiba tang khyndiat hynrei ka jingtrei hok kane ka jingtei ka sa long kumne kumba ka long. “Ka jingdon jong ka Dorbar Hall kan sa long ka jingkyrkhu kaba khraw ïa ki paidbah ha kaba kin ïoh ban pyndonkam ïa kane ha kiba bun ki kam la ka long ban pynlong ki jingïalang bad kiwei de ki bynta”, ong u bah Renik.
Ha kajuh ka por u la kyntu ruh ïa ki paidbah ba ki dei ban sumar bha ïa ka khnang ba kan lait na ki jingshah pynjot bad kum ki paidbah ki dei ban kheiñ ïa ka kum la ka jong ka ïing.
Ha kane ka sngi la ïoh ruh ka jingkren lyngkot na ka kong Violet Rose Talang, JRDO ha kaba ka la ai ka jingkhublei na ka bynta ki paidbah nongshong shnong kiba la ïa trei shitom ban pynurlong ïa kane ka sngi kaba jop bad kyntu ruh ïa ki paidbah ba ki dei ban donkam ïa kane ka jingtei ha ka rukom kaba dei.
Ïa ka jingïalang la pynïaid da u Myntri Shnong Lawblei, u bah Swington Lyngdoh, ka jingrwai pdiang na ki dkhot ka VO bad ka jingkren khublei na u Secretary ka VEC Shnong Lawblei, u bah Shestarly Nongsiej.
