Nongstoiñ, Nohprah, 21: Ka KSU West Khasi Hills District Unit ha ka 20 tarik jong u Nohprah 2022, ka la ïoh ban ïaleh kmen Christmas bad ki 8 ngut ki khynnah skul kiba shem jynjar shem lanot ïa kaba ka Seng ka la kyrshan skul na ka bynta kong ki. Ïa kane ka jingïalang la pynlong ha ka K.K.Vani Hall Nongstoiñ, West Khasi Hills District.
Ïa ka jingïalang la ïoh ban pynïaid da u Samla Willbest Wanniang Edu-cation Secretary KSU West Khasi Hills District Unit. La don ryngkat ha katei ka jingïalang da ki Nongïalam jong ka KSU West Khasi Hills District Unit, hapoh ka jingïalang jong u samla John Fisher Nongsiang President KSU West Khasi Hills District Unit, samla Franklinroy Syiemiong General Secretary KSU West Khasi Hills District Unit, ki nongbud nongsynran ïa ki heprit kiba ka Seng ka la kyrshan skul. La ïadon ryngkat ruh ki Nongïalam jong ka KSU CEC naduh u Samla Raymond Kharjana Education Secretary KSU CEC kum u Kongsan ha katei ka lympung jingïalang.
Na ka liang jong u Kongsan jong ka jingïalang, u la ai ka jingkitbok kit rwiang ïa ka seng KSU West Khasi Hills District Unit, ba kan nang ïai kner ïa ki jingïarap na ka bynta u duk u rangli bad kiba shem jynjar shem lanot. U la kitbok kyrpang ruh ïa ki hep samla kiba ka Seng ka la ai jingkyrshan bad kyntu ba ki dei ban trei shitom ha ki jingpule jong ki. U la ong ba kum ka Seng kam kwah eiei ïa ki jingleh kylliang na ki, hynrei ka Seng ka kwah ba kin siew kylliang da ki kam kaba ki leh na ka bynta ka Ri bad ka Jaitbynriew.
