Plie u Bah Prestone Tynsong ïa ka Cla,Rin-23 resort ha shnong Narwan

Khliehriat, Naiwieng, 05: U Symbud Myntri Rangbah ka jylla, Bah Prestone Tynsong ha ka sngi Saitjaiñ u la plie paidbah ïa ka Cla,rin-23 Resort kaba don ha shnong Narwan, East Jaiñtia Hills District ba la long trai da u Bah Borin Shadap na ka shnong Dkhiah East uba la shna pynwandur itynnad shuh shuh ïa ki sawdong sawkun da ka jingïatreilang bad ka ïing ka sem hi baroh kawei.
U Bah Borin Shadap lem bad ka ïing ka sem ki la lah ruh ban pynlong ïa ka mariang kaba kup rong jyrngam da kaba thung da ki dieng soh, kumjuh ruh kiwei kiwei ki jait dieng ha ka jaka kaba heh 23 akar kaba don hajan bad ka Resort. Ym tang katta, ki don ruh ki pung dohka kiba heh, ka pung jngi kai, ki jingkieng ïaid kjat, ki jaka shongkai pyngngad ban khring ïa ki nongjngohkai pyrthei.
Haba kren kum u kongsan, u Bah Prestone Tyngsong, u la ïaroh bad kitbok kitrwiang ïa u Bah Borin Shadap bad ïa ka ïing ka sem hi baroh kawei ba kin nang ïaid shaphrang ban kyntiew ïa ki kam ki jam bad ïa ka thaiñ hi baroh kawei.
U la bthah ruh ïa u Deputy Commissioner, u Abhilsah Baranwal, uba la ïa don lang ha kane ka sngi ba un buh ha ka
Tourist Map jong ka jylla Meghalaya bad ban ïakren ruh bad u Director jong ka tnat Tourism ban kynthup lang ruh ïa ka Cla,rin-23 Resot hapoh ka Map khnang ba ki briew kin dup tip ïa kane ka Resort. U la ong ruh ba ka Sahksaw kaba don ha shnong Chamcham ruh kaba dang dep plie da u Bah Paul Lyngdoh ka dei kawei kaba itynnad bad ki dang bun shuh shuh ki jaka kiba itynnad.
“Lada jia ba wan kiba nabar lada ki shah shoh ha kane ka shnong bad ha kane ka jaka, nangne kin mih kin leit ïathuh khana wat leit shuh ha kato ka jaka bad kane kan dei ka bih kaba shyrkhei bha na kata ka daw pyntikna ba ka shnong Narwan ka dei ka shnong kaba bha bad kaba shngaiñ bad kane kaba donkam eh,” la kyntu u Symbud Myntri Rangbah.
“Ngi ruh na ka liang Sorkar ngi don ryngkat lang khamtam bad ki riewshimet kiba shim ïa kane ka kam jngohkai pyrthei,” u la ong.
U la ong kyntu ïa ki paidbah ba kin long paralok bad kiba wan jngohkai kiba wan nabar, namar ka jingwan jong ki kan kyntiew ruh ïa ka ïoh ka kot jong baroh ki nongshong shnong bad ha kajuh ka por u pynshlur ruh ïa ki nongshong shnong kiba dei ki nongrep soh ñiamtra ynda ka la ïaid bha kane Resort kan kyntiew ruh ïa ka khaïi pateng jong ki bad kane kan long ka pliang ja pateng la pateng. U la kyntu ba kin nang kyntiew shuh shuh ïa ka rep soh hapoh shnong..
U la ong ba ki don ruh ki skim ba kyrpang ba ka Sorkar ka ai ïa ki samla bym donkam, ka Homestay bad ki skim na ka tnat DMC ruh ha kaba lah ban ai 70 percent, kaba mut T 10 lak tyngka ha kaba T7 lak tyngka ka dei ka subsidy bad T 3 lak ka dei ka Soft Loan kaba hap siew.
“Laba sgewsih ba tengteng ki samla jong ngi ki pynlut por pynban ha ki kamkai ha ki kam ki bym dei, katba ïa ki kam babha ba pynmih da ka Sorkar pat i kumba ym don ba kwah ban peit. Wat pynlut por than ha ki internet na ka bynta ki kam ban kren kynthoh ïa kiwei, ban wad ja ym nang don por pynban ban dro dur bula ïa kiwei hato long mo? Bad kane ka jingmut jingpyrkhat ba sniew kaba don ha ngi ka dang don haduh mynta ruh, tang shu i shrai ïano ïano shoh dkhar yn da kylli balei shoh dkhar ki ong ba ieid jaitbynriew, kum kata ka jait long mo?” u la ong. U la kyntu ïa ki nongsynshar shnong bad kumjuh ruh ïa ki kmie ki kpa ba kin sngewbha ban tehlakam ïa kane.
Ha ka sngi, la ai jingkren ruh da u Myntri ka Sorkar Jylla u Bah Kyrmen Shylla uba long ruh u MLA jong ka Khliehriat Constituency, ka MLA jong ka Sutnga Saipung Constituency ka Kong Santa Mary Shylla, u MLA barim u Bah Justine Dkhar, u Waheh Shnong jong ka shnong Narwan u Bah Lamsuk Langstang.