Leh da kaba tyngeh ïa ki agent dawa pisa ban pyntreikam ïa ki skim sorkar pdeng : Dawa u MDC

Shillong, Naiwieng 05 : U MDC ka BJP na Tura, u Bernard N Marak u la dawa ba dei ban leh da kaba tyngeh ïa ki agent kiba shim pisa na ki paidbah na ka bynta ban pyntreikam ïa ki skim bapher bapher jong ka sorkar pdeng.
Ha ka shithi ujor sha ki Deputy Commissioner jong ki san tylli ki distrik ha rilum Garo, u Marak u la ong ba ki skim sorkar pdeng kim don jingïadei satia bad ki MLA jong ka thaiñ namar ki MLA bad ki agent jong ki kim dei ban tuklar halor ka jingpyntreikam ïa ki skim ka sorkar pdeng.
“Ki Secretary jong ki VEC ha ki katto katne ki shnong ki treikam kum ki political agent kaba ym dei satia ban long kumta. Ki Secretary VEC bd ki Gram Sevak ki dei ban trei katkum ki kyndon jong ka sorkar pdeng. Dei ban leh da kaba tyngeh ïa kitei ki agent kiba dawa pisa na ki paidbah namar kine ki dei ki skim kiba ai ei,” u la ong.
U Marak u la kdew ruh ba ka jingeh kaba ki paidbah haki shnong ki thaw ki ngeit ka long ba u Aadhar u don jingïadei bad uta u ‘666’ bad ki bank ha kawei pat ka liang kim pynïasoh lang ïa ki bank account jong ki paidbah bad u Aadhar Card.
“Kane ka la buh jingeh haduh katta katta ha kaba pyntreikam ban siew da kaba ïaid lyngba u Aadhar sha ki nongïoh jingmyntoi. Dei ban kyntu ïa ki Bank ban pynïasoh ïa u Aadhar bad ki bank account. Ha South Garo Hills dei ban don ka bank bad ka mobile connection ha Rongara bad ha kiwei ruh ki jaka namar ki nongïoh jingmyntoi na katei ka block ki hap ban ïaid kumba 80 kilometer sha Baghmara na bynta ki kam ba ïadei bad ki ophis.
Shuh shuh u ong ruh ba ha katei ka jingleit jong u kylleng, u la lap ba ym don satia ki Block lane ki VEC kiba pyni ïa ki rukom treikam katkum ka kyndon kaba la wanrah ïa ka jingkulmar kaba khraw bad ka jingbymsngewthuh jingmut kaba poi ruh haduh u pud ka jingshah shim kabu ki paidbah ha ki agent kiba dei ki nongïoh.
“Kine ki agent ki pynbor ïa ki nongïoh jingmyntoi kiba duk ba kin siew bun bha ka pisa ban ïoh ïa ka skim watla kadei kaba kin ïoh khlem donkam siew ei ei. Ngin kmen eh lada kan don ka ka permanent waitlist ha ki block bad ki shnong. Ngin sa pynshisha ïa ki ha ka shi taiew,” bynrap shuh shuh u Marak.
Katkum ka jingong jong u, bun ki block ha kiba bun ki distrik ki treikam da ka jingeh namar ka jingduna ki nongtrei kynthup naduh ki Gram Sevak, Gram Sevika ha kaba ki hap ban trei palat ïa ka bor jong ki ban peit lang ïa kiwei pat ki gram sevak circle.
“Sngewbha shimkhia bad pyndap noh ïa ki kam kiba lait thylli na kabynta ban ïoh pyntreikam pura ïa ka skim.” Nalorkata u la kdew ruh ba donkam ka jingpynbiang ïa ki tiar treikam katkum ka juk mynta kiba dang duna ha kiba bun ki block. La kdew ruh ba ki nongtrei ha ki RGSA, DDU, GKY kim pat ïoh satia ïa ka tulop nalor ba ka bainong trei na ka bynta ki skim MGNREG ki la sahteng namar ka jingbym biang ki kor internet.