Shillong, Risaw 27: U MLA ka Mawkynrew Consti-tuency u Bah Banteidor Lyngdoh ula plie pyrda ïa ka lympung ïalehkai 4th Mawkynrew Cup mynta ka sngi Thohdieng ha madan Jongksha.
Ha kane ka lympung ki la don haduh 40 tylli ki kynhun jong ki shynrang bad 16 tylli ki kynhun jong ki kynthei kiba la wan ïashim bynta ha kaba yn sa bteng biang ïa ki ha ki sngi ki ban wan.
Hashwa ban sdang kane ka lympung ïalehkai, la pynlong ïa ki prokram bapher bapher kiba kynthup ïa ki jingiaid march pass jong ki skul bapher bapher jong katei ka thaiñ, ki jingrwai bad jingshad bapher bapher.
Nalor u Kongsan, la ïadon lang ruh ha kane ka sngi kynthup ia u BDO ka Mawkynrew u Bah G. Dhar kum u Symbud kongsan, u Sordar ka Jongksha u Bah Olet Kharsahnoh, ka Chairperson ka Mawkynrew Cup Committee ka Kong Amanda Annette Pakyntein bad kiwei.
Haba phai sha ka jingïakhun mynta ka sngi sdang, ka Jongksha FC ka la khur ïa ka jingjop hadien ba ka la lah ban pynliem noh ïa ka Khapmaw FC da 1-0 kol bad ïa kane ka shi kol la thep da u Pyrkharborlang Kharsahnoh ha ka minit kaba 63.
U Bah Banteidor u la pynpaw ba lyngba kane ka lympung ki la mih shibun ki rangïalehkai kiba la ïoh ban ïalehkai na ki klob jong ka Shillong Premier League, kumjuh na ki klob jong ka First, Second, Third bad ka Fourth Division. “Nga sngewkmen ba lyngba kane ka lympung ki la mih shibun ki rangïalehkai kiba la ïoh ban mihkhmat ha ka Shillong League ba la pynïaid da ka Shillong Sports Association (SSA) bad nga khmih lynti ba kin nangïai mih shuh shuh ki rangïalehkai ki ban ïoh ïashim bynta na ki klob ka nongbah Shillong bad wat shabar jylla ruh kumjuh.”
“Dei lyngba ka jingmih ki rangïalehkai ba ngi sa shim ïa ka rai ban pynlong ia ka Mawkynrew Cup na uwei sha uwei u snem namar ki ïoh ïa ka lad ban mihkhmat na ki klob ha ka Shillong League.”
