Mawkyrwat, ‘Naiwieng 06: U Martin M. Danggo uba long u nongmihkhmat barim jong ka Ranikor Constituency bad kum u Myntri jong ka sorkar Meghalaya ha kine ki snem kiba la leit bad uba long ruh kum u kongsan, u la ïoh ban plie pyrda ïa ka lympung ïalehkai kynjatbol ba la tip kum ka VII Invitation Football Tournament 2022 kaba la pynïaid da ka Thaiñ Ban Kyntiew Youth and Social Welfare Organisation (TBKY&SWO) ha madan Ersaikohpoi, Ngunraw, South West Khasi Hills District.
Ha kane ka sngi plie pyrda la ïoh ban ïalehkai sdang da ka Chi-ïong-mut Football Club bad ka Thangbyrniang Football Club ha kaba wat ha ka madan kaba dang long khoh ruh khohram hynrei ki ‘rangïalehkai ki la pyni shisha ïa ka jinglah jong ki ban ïa pashad bol bad kaba la pyni-itynnad ruh na ka bynta ki nongpeitkai.
Hapdeng jong ka jingïalehkai naduh ba sdang haduh ba kut jong ka, ka Chi-ïong-mut FC ka la ïoh ban pynliem noh da 7 – 1 kol pyrshah ïa ka Thangbyrniang FC ha kaba ïa ki kol jong ka la ïoh ban thep da u Kyrmen Iawphniaw ha ka minit kaba 6&31, na u Reson Lyngkhoi ha ka minit kaba 32, na u R. Thongni ha ka minit kaba 50, na u Lones Lyngkhoi ha ka minit kaba 59 bad na u Phiban Iawphniaw ha ka minit kaba 77 & 80 katba ïa ka shi kol jong ka Thangbyrniang FC la thep da u Khrawkupar Nonglang ha ka minit kaba 28.
U Martin M. Danggo uba long u nongmihkhmat barim jong ka Ranikor Constituency haba kren kum u kongsan ha ka jingïalang ba lyngkot u la pynpaw ka jingaikhublei na ka bynta ka TBKY&SWO kaba long ka nongpynïaid ïa kane ka lympung ïalehkai kynjatbol bad kaba long kum kawei na ki bynta ban sei ïa ki samla ba don sap ha ka kam ïalehkai ba kin mih shakhmat ban pyni ïa ka jinglah jong ki ha kane ka bynta. Namarkata, u la ai mynsiem ïa ki ba haba ki don ïa kane ka sap ki dei ban pyndonkam hok ïa ka khnang ba kan long ka jingïarap na ka bynta ka lawei ha ka la shai la shi sngi.
Haba bynrap shuh shuh ïa ka jingkren u la ai mynsiem ruh na ka bynta baroh ki kynhun kiba la wan ban ïashimbynta ha kane ka VII Invitation Football Tournament 2022 ba kin sa ïalehkai bha bad ïaleh da ka mynsiem jong ka jingtreishitom khnang ba kin ïoh ban poi sha ka thong jong ka jingjop.
Ha kane kajuh hi ka sngi, bah Kitborlang Nongrem, kum u symbud kongsan u la ïoh ruh ban ai sngewbha da ki spoti (Jersey), ka bol bad ka song pisa kum ka dak jong ka jingkyrshan lem na ka bynta ka Thaiñ Ban Kyntiew Youth and Social Welfare Organisation (TBKY&SWO) ba kan ïoh ban pynïaid shaphrang ïa kane ka lympung ïalehkai kynjatbol.
Kiwei pat kiba la wan ban sakhi ïa kane lympung ïalehkai ki long u bah Manstudy Nongrem lem bad kiwei de ki ‘riew rangbah jong ka dong ka thaiñ kiba la sha khot sngewbha. La pynshit pynshngaiñ shuh shuh ïa kane ka lympung ïalehkai kynjatbol lyngba ki jingpynbyrngia na ka PHL Group na shnong Mawten, South West Khasi Hills District bad kumjuh ruh na ka kynhun Black Pink na Rangjadong.
Lah ban kdew ba ha kane ka VII Invitation Football Tournament 2022 ki don baroh 16 tylli ki kynhun na kylleng ki jaka jong ka South West Khasi Hills District bad kumjuh ruh na East Khasi Hills District.
