K i nongshong shnong ka jylla ki dei kiba sngewtynnad bha ïa ka put ka tem ka rwai ka siaw bad lada shu ong kyllum ki dei kiba sngewtynnad bha ban shim bynta ha ki kam tamasa bapher bapher kiba ju don ha ka jylla. Kane ka jingshongshit jong ki paidbah kam dei satia tang ha ki tamasa hynrei la ïohi ruh ba ki long kiba sngewtynnad wat ban snohkti lang ha ki jinglehniam la ka long naduh ka shad Nongkrem, shad Suk Mynsiem, ka shad Wangala, ka Khristmas ne wat ki jinglehniam jong kiwei ki jaidbynriew ruh.
Tang kawei kaba ki nongshong shnong ki ju khihwin eh kadei ba tang shu don ki lympung ba don ki nongrwai nongtem na shabar baroh baroh la shu ïa tuid lut ban leit peit bad dei na kane ka daw ba la ju tip ïa ka nongbah Shillong ne ka Meghalaya kadei ka jylla ba ieid jingrwai. Hynrei lada kren pat ha kawei ka liang, kiei ki jingmyntoi ba ka jylla ka ïoh haba pynlong ïa kum kitei ki lympung. Hato ka bai rung kaba mih na ka jingwan ki paidbah kan leit sha ka ïarong jong ka sorkar ne ka leit tang sha ki nongpynïaid. Lada dei ba ka leit sha ka pla tyngka jong ka sorkar khlem pep kan long ka jingïarap kaba khraw namar na kane ka pisa pat yn lah ban pyndonkam na ka bynta ban shna pynbha ïa ki lynti syngkieng, lane ki jaka sumar bad wat ïa ki iing skul. Hynrei lada jia pat ba ka poi sha kiwei ki jaka lehse kan ym long ka khubor kaban pynsngewtynnad ïa kiba bun balang.
Watla ki nongshong shnong kiba ju smat ban leit sha kitei ki lympung kum sha kita ki Cherry Blossom ne kiwei pat kim da khmih lynti eh ba ka jingleit jong ki sha kitei ki lympung ka dei ban ïarap na ka bynta ban kyntiew ïa ka roi ka pa hynrei kadei pat ka jingkitkhlieh jong ka sorkar ba ka shad ka kmen ka dei ban ïaid ryngkat ryngkat ruh bad ka roi ka pa.
Ha kine ki khyndiat bnai ban wan, ka jylla kan sa sakhi ïa ki tamasa ba harukom kiban pynshongshit ïa ki khun samla jong ka jylla da ki jingpynbyrngia ba harukom khmatam da ki jingkhawai jingrwai. Katkum ka jingong jong u Myntri Rangbah ka jylla, ka don ka jingantad ba ka jingpynlut na ka bynta kitei ki tamasa kan poi la kumno kumno 12 haduh 15 klur tyngka kynthup lang ban pynlong ïa ka Northeast Olympic Games.
Lehse ka don ruh ka jingkhmih lynti ba da kaba pynlut haduh kattei kattei klur kan don teng ka jingmih kaba bun kiban pynmyntoi pat ïa ka sorkar ha kiba bun ki liang ym dei eh ban shu pynlut. Lait noh na kaba pynlong ïa ka Northeast Olympic Games kaba dei ka lympung na ka bynta ki samla ïalehkai jong ka thaiñ shatei lam-mihngi jong ka Ri ban pyni ïa ka sap ka talen ba ki don, kiwei pat ki lympung kiba bun ki dei beit tang ban shu pynkmen ïa ki nongwan. Ha kawei ka liang ka Meghalaya ka la dei ruh ban pynleit jingmut na ka bynta ban tei ïa ki jaka bam kiba paka ha man ba don ki jaka jngohkai kiba pawnam ha ka jylla khnang ba kan ym pynlehrain ïa kiba nabar ba ynda ki wan kai sha kane kin ym donkam ban da leit wad ïa ki jaka bam kiba biang shaduh pajih na katei ka jaka jngohkai.
Kumban shu ai nuksa, tang ha Sohra lada biang ki jaka bam, ki nongwan jngohkai kin ym wan beh shaduh Shillong ban wan bam hynrei kin kham pynlut ka por bad ka iing ka sem ban shang kham slem sha kito ki jaka ba ki la mang khnang ban pynlut. Ki dang don bun ki jingduna lada ïa kren lada ka sorkar ka thmu shisha ba kyntiew ïa ka kam jngohkai khamtam eh ha ka jingdon ïa ki lynti syngkien kiba bha bad kiba biang nalor kiwei kiwei.
