Shillong, Naitung 18 : U Symbud Myntri Rangbah ka jylla u ma Sniawbhalang Dhar u la plie paidbah ïa ka Dorbar Hall jongka shnong Moodop Nartiang bad kumjuh ruh ïa ka ïing skul kaba thymmai jongka Nartiang Moodop Government LP School.
Haba kren u la ong ba kane ka dei ka sngi sah kynmaw namar ka shnong ka la ïai ap khmih lynti la jan 160 snem ban ïoh ïa ka Dorbar Hall kaba biang. “ Kumta lyngba ka MLA skhim jong nga jong u snem 2024-25 la mang haduh 45 tylli ki Dorbar Hall. Ka lah ban long kaba rit hynrei kan long pat ka prokram ban sah jingkynmaw.
U la ong ruh ban tei ar tylli ki iing skul ba heh ha kajuh ka jaka kam long satia kaba suk hynrei ka long kaba donkam namar kiba bun ki kmie ki kpa kim kot bor ban phah skul ïa ki khun sha Jowai ne Shillong.
U la ong bun kiba pep skul noh shiteng por haba ki la poi sha ki kyrdan ba shalor namar ka jingduk bad jingbym biang ki jaka pule. U la ïathuh ka sorkar ka dang pynkhreh ban kyntiew kyrdan ïa ki Secondary bad Higher Secondary skul hapoh ka jylla.
“Kumba 2500 tylli ki skul ki la ïoh pdiang ïa ki jingïarap ban tei ïa ki skul, ki ben bad shuki. La pynlong da ki hajar klur tyngka ha kapule puthi hynrei ka jingdawa ka dang bun” ong u ma Sniawbhalang
ïa kane ka prokram la sdang da ka jingduwai na u Rev H.L Pale, la ai ïa ka jingrwai pdiang sngewbha da ka Moodop bad Kpermyrshieh Village Organisation. Kiba la ïadon ryngkat ki long u CEM ka JHADC u ma Thombor Shiwat, SDSEO West Jaintia Hills E Synrem, Head Teacher K Thubru, Waheh Shnong D Dkhar, Secretary Dorbar Shnong Y.Lamare Youth Adviser H. Khynriam bad Chairman T. Phawa.
