Nga kmen palat ba kane ka la urlong bad ïoh plie mynta: Bah Sanbor

Shillong, Naitung 18 : Ka Shillong South Constituency ha ka sngi Saitjain ka la ïoh sa kawei pat ka iew kaba heh kaba la shna ha ka dur ka mall ha ka jinglut kaba la kot sha ka 14.27 klur tyngka kaba la tip kum ka ïew Municipal thymmai ha Iewdak, Laban, Shillong
Ïa kane ka iew kaba don haduh saw mala la plie paidbah da u Myntri sorkar ka jylla bah sanbor Shullai uba dei ruh u MLA ka thaiñ ha ryngkat ka jingdonlang u Secretary ka North Eastern Council u SK Bhalla kumjuh u CEO ka Shillong Municipal Board u PK Boro, nalor u Rangbah Shnong ka Laban Bah Edward Kharwanlang nalor ki Rangbah Shnong ka Raid Laban.
Ïa kane ka ïew Municipal kaba don saw tylli ki mala (RCC+4), kaba kynthup ruh ïa ka Community Hall jong ka Dorbar Shnong Laban, la tei da ka jingïarap pisa na ka North Eastern Council (NEC), Sorkar India, ha ka jinglut kaba kot 14.27 klur tyngka. Ïa kane ka projek la pyntrei da ka Shillong Municipal Board (SMB) hadien ba la ai jingmut da u Bah Sanbor Shullai.
Haba kren ha ka jingïalang u Bah Sanbor Shullai u la ong ba u dap da ka jingkmen kaba khraw ban sakhi ba katei ka iewdak kan urlong namar ka dei ka projek kaba u thrang naduh ka dohnud. “Nga ai khublei ïa u Myntri Rangbah ka jylla, u Conrad K. Sangma, bad ïa ka sorkar jylla namar ka jingkyrshan kaba bteng ban pdiang ïa ki projek bapher bapher kiba dei na ka bynta ki paidbah ka constituency bad ka jingmyntoi jong ka jylla hi baroh kawei,” u la ong.
U la pyntip ruh ba la mynjur sa 2 klur tyngka ban tei sa kawei ka Public Hall ha ka mala kaba hajrong duh (terrace) jong kane ka ïew, bad ka jingtrei kan sdang naduh une u bnai. Nalor kata, la mang ruh sa 2 klur tyngka ban pynbha bad pynheh ïa ka Lumshatsngi Market, bad ka jingtrei kan sdang ruh hapoh une u bnai.
U Myntri u la ong ruh ba la phah ka projek jingïoh jingïarap pisa kaba kot 35 klur tyngkana ka bynta ka Cantonment Area, bad na kane ka pisa la dep mynjur lypa 18 klur tyngka.
Hashuwa ban plie ïa ka ïew Municipal, u Bah Shullai u la plie ruh ïa ka surok kali kaba shna hajrong ka nala ïaid um kaba la tei ha ka jinglut kaba kot 1.65 klur tyngka.
Ha kajuh ka por u ai khublei ïa ka sorkar pdeng bad ka sorkar jylla kiba la mynjur ïa katei ka projek kaba heh lyngba ka North Eastern Council.
U Secretary ka North Eastern Council (NEC), u S.K. Bhalla (ITS), haba kren ha kane ka jingïalang, u la ong ba ka jingplie ïa kane ka projek ka dei ka u soh jong ka projek kaba la sdang bun snem mynshwa. U la ong ba kane ka jaka kan ai jingmyntoi ym tang ha ka liang ka kamai kajih lyngba ka ïew Municipal, hynrei kan long ruh ka jaka na ka bynta ki jingïalang jong ka shnong bad ki prokram deiriti lyngba ka Community Hall, bad kan pynkhlaiñ ruh ïa ka synshar shnong da kaba pynbiang ïa ka ophis jong ka Dorbar Shnong.
Katba na ka liang u Chief Executive Officer (CEO) ka Shillong Municipal Board, u P.K. Boro, u la pynpaw ïa ka jingsngewnguh ïa u Bah Sanbor Shullai halor ka jingkyrshan jong u. U la ai khublei ruh ïa ki ophisar bad nongtrei ka Shillong Municipal Board bad ïa ka Dorbar Shnong Laban namar ka jingïatreilang kaba la pynurlong ïa kane ka projek.
Ha ka jingkren, u Rangbah Shnong ka Dorbar Shnong Laban, u Bah Edward Kharwanlang, u la kyrpad ïa ki nongdie dukan ba kin sumar bha ïa ka khuid ka suba bad sumar ïa ka ïew, khnang ba kane ka jaka kan bteng ban ai jingmyntoi ïa ka shnong bad ïa ki paidbah.