La pyllait paidbah ïa ka kot shaphang ka jingïadei histori hapdeng ki Khasi – Jaiñtia bad ki Karbi

Shillong, Naitung 18 : Kawei ka jingïaid shaphrang kaba kongsan ha ka liang ka jingïatylli jong ki jaitbynriew la sakhi ha ka sngi Saitjaiñ, da ka jingpyllait paidbah ïa ka kot “Khasi-Jaintia and Karbis : From Symbiotic History to an Ongoing False Dispute—Karbi Youth Festival as the Confluence of Two Communities” ha Conference Hall jong ka Karbi Hemtun (Karbi Anglong Guest House), Shillong.
Ïa kane ka kot la pyllait paidbah ha ka jingïalang a kaba la wan jingïashim bynta da ki riew rangbah bad ki kongsan na Diphu bad Shillong ha kaba u Paiem Laborious Manik S. Syiem u la long kum u Kongsan katba u Jones Ingti Kathar, IAS (Retd.) u la long kum u Symbud Kongsan
Kiwei pat kiba la shah khot kyrpang ki kynthup ïa ka samla Deivica Dkhar, kaba dang pule PhD ha ka Physics Department, Assam University, Silchar bad kaba long ruh ka President jong ka Khasi Students’ Union (KSU), Assam University Unit, bad u John Engti Kathar, President jong ka Karbi Students’ Association (KSA), Shillong.
Ïa kane ka kot la thoh da u Hirolfsberg Rongphar, uba dei u Assistant Professor ha ka Department of History, Nehru College, Pailapool, Cachar, bad uba dang leh ruh ïa ka jingwadbniah PhD ha ka Department of History, Assam University Diphu Campus, Karbi Anglong.
Katkum ka kyrwoh, la ong ba ha kane ka kot, u nongthoh u la wad bniah ïa ka jingïadei histori kaba jylliew hapdeng ki Khasi-Jaiñtia bad ki Karbi bad u la pynpaw ba ka Karbi Youth Festival ka long kum ka jingïakynduh bad ka jingïatylli jong kine ar tylli ki jaitbynriew.
La ong ba ka jingthmu jong kane ka jingthoh ka long ban pynshai ïa ki jingïadei kiba la neh naduh mynbarim, ban pynduh ïa ki jingpynsaphriang kiba pynmih jingïakajia ha kine ki sngi, bad ban pynpaw ïa ka histori jong ka jingïalong paralok bad jingïaieid hapdeng kine ar tylli ki jaitbynriew.
Kane ka long katkum ka kyrwoh ba la phah da u Hirolfsberg Rongphar ba dei ruh u nongthoh jong kane ka kot.