Nongpoh, Kyllalyngkot 03: Kum shi bynta ban lehkmen snem thymmai bad ruh ban ïalehkmen leh sngewbha da ki prokram bapher bapher na ka bynta ki khun samla jong ka shnong Patharkhmah, ka Patharkhmah Youth Club and Social Welfare Origination ha ka 2 tarik u Kyllalyngkot 2024 ka la plie pyrda noh ïa ka taiew lehkmen ki samla bad kan sa pynhap pyrda noh ha ka 9 tarik u Kyllalyngkot 2024.
Ïa kane ka taiew lehkmen ki samla la wan ban plie pyrda da u MDC ka Jirang Constituency, u Bah Victor Rani kum u kongsan bad u President ka Western Ri Bhoi Dorbar, u Bah Anias Rani kum u symbut kongsan bad la sakhi lang ruh da ka jingdon lang u Rangbah Shnong ka Patharkhmah, u Bah Petalman Thangkhiew bad kiwei kiwei ki riew rangbah ka Shnong.
Naduh kane ka sngi ba la sdang ban plie paidbah ïa kane ka taiew lehkmen ki samla, ka Seng Samla Patharkhmah ka la pynlong da ki jingïalehkai bapher bapher ba la wan ban shim bynta da ki khun samla ka shnoing Patharkhmah bad la pynshit pynshngaiñ ruh da ki jingrwai bad ki jingshad jong ki khun samla.
Kumba la pyntip da ki nongïalam katei ka Youth Club, la ong ruh ba ha ka sngi ban pynkut noh ïa kane ka taiew lehkmen ki samla yn wan pynshongshit ruh da u nongrwai ba paw ka jylla, u Samla Wanjop Pyngrope ryngkat kiwei kiwei ki kynhun nongrwai bad ki nongshad.
Haba ai jingkren ha kane ka sngi kum u kongsan, u Bah Victor Rani u la ai khublei snem thymmai ïa baroh ki paidbah ka Patharkhmah bad ai khublei kyrpang ruh ïa ka Seng Samla kaba la pynlong ïa kane ka taiew lehkmen kaba long shi bynta ban lum lang ïa ki khun samla ban don kata ka mynsiem jong ka jingïatrei lang hapoh ka shnong ka thaw.
U la ong ruh da kaba pynlong ïa kane ka taiew lehkmen ki samla ka long ruh ka lad ka lynti ïa ki khun samla ba kin sei ïa ki sap ki phong ba ki don ha ki bynta bapher bapher bad kyrmen skhem ruh ba kane ka lympung ïa kynduh lang ki khun samla ka Patharkhmah kan long ruh ka nuksa kaba bha ïa kiwei pat ki khun samla jong ki shnong bapher bapher hapoh ka Jirang Constituency.
Kum u nongmihkhmat paidbah u la kyntu ruh ïa ki khun samla ka Patharkhmah ba kin dang don kata ka mynsiem ban trei na ka bynta ka bha ka miat jong ka shnong ka thaw bad kum ki samla ki dei ban long kita ki samla kiba don ka jingkitkhlieh ha ing ha sem ha shnong ha thaw, khnang ba ka shnong ka thaw bad ka dong bad ka thaiñ kin dang kiew shaphrang ha baorh ki liang jong ka jingim briew, u la bynrap.
