Khliehriat Kyllalyngkot 03: Ka Jaiñtia National Council (JNC) kum shi bynta ban pynïar bad pynkhlaiñ ïa ka jingtreikam ka seng, myn ha ka 2 tarik mynta u bnai ka la ioh ban pynkha ïa ka Jaiñtia National Council-Western Zone ha West Jaiñtia Hills District, la ïoh ruh ban jied bad pynskhem bad pynbam smai ïa ki nongkitkam bad ki dkhot da u President rangbah, u bah Sambormi Lyngdoh.
Haba kren ha ka jingïalang, u bah Sambormi Lyngdoh u ai ki kyntien kiba ai mynsiem ïa ki nongïalam bad ki dkhot jong ka Western Zone, u la ong ruh ba kum ki nongïalam kidei ban long kiba skhem ka nongrim bad ki dei ban don ka jingshaniah, ka jingïatreilang, ka jingia ieid iwei ïa iwei khnang ba yn dup lah ban pyntyllun ïa ki kam ki ban ai ïa ka jingshakri kaba paka ïa ka ri bad ka jaidbynriew, u la bynrap ruh da kaba ong ba ka West Jaiñtia Hills ka dei ka wei na ki District kaba don ïa ki ba nang kiba stad bad ki la don ruh shibun kiba la lah ban ai ka jingshakri ïa la ka rilum Jaiñtia kum ka jingnoh syniang sha ka imlang ka sahlang, u la ai ka jingkhublei kitbok kitrwiang ruh ïa baroh ki nongïalam bad ki dkhot jong kane ka shnat treikam, ba kum kiba stad ki dei ban pyndonkam ïa ka jingstad sha ki ba bun ki bynta kiba long ka daw bah jong ka jaidbynriew.
Kiba la ïa don ryngkat lang ha katei ka jingialang pynkha tnat ha West Jaiñtia Hills, ki kynthup ruh u General Secretary JNC- CEC, u bah Wanshwa Suting, ki Vice president ba kynthup u bah Ency Shadap bad u bah Nangjan Dkhar, Assistant Secretary, u bah Allmiki Ryngkhlem bad u Publicity secretary JNC-CEC, u bah Mebanteilang Sukhlaiñ bad kiwei kiwei ki nongïalam kiba na ki unit, ki Circle bad ki zone bapher bapher jong ka JNC, ïa ka jingïalang la pynïaid da u Arts & culture secretary, u bah Mehi Rymbai.
Ki nongkitkam jong ka JNC Western Zone, kiba la jied bad pynskhem ki kynthup, u President, u bah Leo Ferdinand Dhar, Vice President, u bah Hamehi Bamon, General Secretary, u bah Heibormi Lyngdoh, Assistant Secretary, Marcel Rumut, Finance secretary, Kitboklang Kharbhih, Assistant Finance Secretary, Heipormi Sapuh, Organising Secretary, u Rapmeki Pohti, Education Secretary, u bah Damehi Marcio Pasi, Arts & Culture Secretary, u bah Daohi Shylla, Environment Secretary, u Eipura Sten, Publicity Secretary, u Pynbiang Rabon, Assistant Publicity Secretary, u bah Ferdinand Phawa, Sport Secretary, u Hubert Dkhar, Office Secretary, u Wansalan Dhar, lem bad 18 ngut ki dkhot Executive.
