Khliehriat Kyllalyngkot 3: Ka Jaiñtia National Council Wapung Circle lyngba u kyrwoh na u Vice President, u bah Distar Dkhar, ka ai ka jingiaroh ïa ki pulit jong ka Ladrymbai Outpost bad ong ruh ba lyngba ka jingstad bad jingshemphang jong ki ba yn sa ioh ban kem noh ïa u runar, u Monkiru Chyrmang, uba la shim noh ïa ka jingim jong kawei ka longkmie kaba na Wapung Shnong, ka kong Lita Ryngkhlem.
Ha kajuh ka por ka seng ka ai ruh ka jingiaroh shikat dei eh îa ki VDP jong ka Shnong Mookhep namar dei lyngba jong ki ba la ioh ban kem ïa une u runar uba tip kyrteng u Monkiru Chyrmang, namar dei hadien ba ki VDP ki la leit ban aiti noh ïa utei u runar sha ki pulit Ladrymbai bad ruh dei namar ka jingstad jong ki pulit ba utei u runar un sa phla ba u dei ma u, uba pyniap dusmon ïa ka Kong Lita Ryngkhlem bad mynta ïa utei u runar la aiti pat sha ka tnat Khliehriat Women’s police ban leh ïa kaba donkam.
Na ka liang ka seng ka kyrpad jur ïa ki bor jong ka aiñ ba kin leh da kaba tyngeh ïa utei u runar khnang ba kiwei ruh kiba thmu ïa kaba kum kane ka kam sniew ba shyrkhei kin hap ban da pyrkhat bun sien hashwa ban leh ïa ka kam runar, kam sniew ha ka imlang ka sahlang
Kum ka dak ka jingsngew lem ïa ka ïing ka sem jong ka (L) Lita Ryngkhlem, ka JNC Wapung Circle ka phah ïa u kyrwoh jingsngewlem sha ki khun ki kti bad baroh kiba ha iïng ha sem, kiba kynduh kum kane ka jingjia ba sngewsih ha ïing ha sem, ka seng ka buh ruh ka jingkyntu ïa baroh ba dei ban nang ban burom bad ban ieid ïa ki kynthei, ki khynnah khamtam ki longkmie, ym ban shu shim ïa ka jingim bad ïa ka mynsiem briew, ha kajuh ka por ka seng ka pynrem jur ruh ïa kum kine ki runar kiba leh ïa ki kam bymman bad kiba pynsniew dur ïa ka imlang ka sahlang ha shnong ha thaw.
