Tura, Naiwieng 10 : U Swapnil Tembe Deputy Commissioner jong ka West Garo Hills District hynne ka sngi Balang u la plie paidbah ïa ka Khelo India Centre kaba la buh ha Govt. Girls’ Higher Secondary School, Tura, ha ka jingïadon lang u Saljagring M Marak uba dei u District Sports Officer, principal jong ka skul Arlinda M Marak, ki nonghikai, ki khynnah skul bad kiwei dei kiba la shah khot sngewbha.
Haba ai jingkren ha katei ka jingïalang, u Deputy Commissioner u la ong ba ki jingïalehkai ki long kiba kongsan kumba ka long ha ki jingpule na ka bynta ki khynnah skul bad kyntu ruh ïa ki khynnah skul ba kin shim ïa kane ka lad ka kabu ba kin sei ïa ki sap ïalehkai lyngba katei ka centre. U la pyntip ruh ba ki don ar tylli kiba kum kitei ki centre ha West Garo Hills ha kaba ïa kawei la ai sha katei ka skul. Ban nang pynhlur shuh shuh ïa ki nongïalehkai ha katei ka District, u Swapnil u la ong ba ka Turathon, ka jngai kumba 42 km, ïa kaba yn sa pynïalehkai ha ka 12 tarik Nohprah bad kyntu ïa ki khynnah skul ba kin ïashim bynta ha katei ka jingïalehkai.
Na ka liang u Saljagring M Marak uba dei u District Sports Officer, haba batai shaphang ka Khelo India Centre, u la ong ba lyngba ka jingplie ïa katei ka centre, ka District ka kyrmen skhem ba kan ïoh ban pynmih ki nongïalehkai ban ïakhun ha ka Olympic.
Ka Arlinda M Marak kaba dei ka Principal jong ka skul ka la ïathuh ba ka Khelo India kadei ka prokram jong ka sorkar pdeng kaba kyntiew ïa ki kam ïalehkai naduh tynrai ha baroh kawei ka ri India da kaba pynkhlaiñ ïa baroh ki shnat ïalehkai hapoh ka ri bad ban pynlong ïa ka India kum ka ri jong ki jingïalehkai. Ka la pyntip ruh ba 30 ngut ki khynnah skul jong katei ka skul ki la shah jied ban pyntbit ha katei ka shlem bad ka Rosina Ch Momin, kaba dei ka nongïalehkai jong ka ri India kaba dei ruh ka khynnah skul barim jong katei ka skul, ka la shah thung ban long kum ka coach ha katei ka centre.
