Khliehriat, Nailar 14 : U Deputy Commissioner ka East Jaiñtia Hills District, u Shivanh Awasthi, IAS u la plié paidbah ïaka wei ka shlem ai jinghikai thaiñ jaiñ ha Ladrymbai-B, ka Ladrymbai Handloom Weavers Cooperative Society EJHD ba la lam khmat da u Leader jong ka Project, u Martin Khiangti, u Secretary jong ka Society, u Reginald Khiangti bad ka Buhoi Chorei bad ka kalpana Rai kum ki Instructor.
Katei ka shlem ai jinghikai ka la buh thong ban ai jinghikai haduh san phew ngut ki briew bad ïa mynta hi ka Society kan sdang shwa bad ki ar phew san ngut ki ban wan shah hikai ha kane ka centre kum ka phase ba nyngkong bad yn bud pat sa ar phew san ngut ha ka phase kaba ar bad kumta ter ter kan iaid da ka phase.
Haba kren kum u kongsan, u Deputy Commissioner ka East Jaiñtia Hills District, u Shivanh Awasthi, IAS, u la pynpaw ïaka jingangnud jong u ban kyntiew ïa ki jait mar kiba pynmih napoh ka district, kum ki jaiñ ba ki thaiñ hi, ki jait jingbam, jingdih bad kiwei kiwei ki jait tiar ba shna hi da ki briew kiba napoh ka district, halor kane u la iathuhh ruh ba u la dep ban shong jingialang bad ki bor ba pyniaid ïa ka ïew jong ka Vishal bad Mega Mart ba don ha Khliehriat bad kyntu ïa ki ba ki dei ban buh lang ïa ki jait tiar kiba pynmih da ki briew kiba napoh ka district ruh ha ki dukan jong ki kiba don ha sor bah Khliehriat khnang ba ki tiar ba pynmih napoh ka district ruh kin ïaid ïew, u la ong ba un sa pyrshang ruh ban buh kawei ka jaka ha DC ophis ha Khliehriat ka ban buh pyni nam ïa ki tiar ba pynmih na East Jaiñtia Hills District kiba don da ki kyrteng ne Brand name bad ki phone number namar haba wan ki briew kiba na bar kiba wan donkam ha DC ophis kin iohi bad kin thied ïa ki tiar.
U la ong ruh ïa kiba pyniaid ïa kane ka Ladrymbai Handloom Weavers Cooperative Society ba kin pyntip sha u lada ki dang donkam ïa ki machine thaiñ jaiñ kiba thymmai ha kaba na ka liang ki bor district kin kyrshan lang ban kyntiew ïa kane ka centre.
“Naduh ba nga shimti ïa ka kam kum u Deputy Commissiner ha East Jaiñtia Hills District, ka jingthmu kaba hakhmat eh ka long ban kyntiew ïa ki kam jong ki briew ba don sap kiba pynmih ïa ki jait tiar bapher bapher, kum ki jaiñ, ki jait jingbam, jingdih bad kiwei kiwei ki jait tiar ba shna hi da ki briew kiba napoh ka district”.
“Ki la don bun ki nong khaïi ba die ia ki tiar shna hi kiba la wan ïakynduh ïa nga bad kiba bun na ki, ki dei kiba la don la ki jong ki jong ki kyrteng ne ki Barnd Name jong ki jait tiar ba ki pynmih, te da ka jingiatrei lang yn lah ban kyntiew shuh shuh ïa ki bad ngin ïa treilang ruh ba ngi dei ban don tang kawei ka kyrteng ne Brand name ka ban pyni sha kiwei pat ïa ki jait tiar kiba pynmih napoh ka District, naamar haba peit kum ki tiar ne kine ki jaiñ ba la thaiñ na kane ka shlem kaba na Ladrymbai ruh kam don ka kyrteng Brand name namar haba ai sngewbha ne die hano hano dei ban don da ka kyrteng (Brand name) ba ki briew kin dup tip ba ki dei ki tiar kiba na East Jaiñtia Hills District” ong u DC.
U la pynsngew ruh ba ryngkat ka jingiatreilang bad ka tnat Meghalaya Skill Development Society yn sa lah ruh ban wanrah shibun shuh shuh ki shlem ai jinghikai bapher bapher ban kyntiew ïa ki paidbah jong ka district namar ki don ki ïing ne building jong ka DMF bad ki ïing sorkar ruh ki don kiba lah ban pynlong kum ki centre ne ki jaka ai jinghikai bad la khmih lynti ba ha ki snem ki ban wan yn sa lah ban leh kham bha shuh shuh ban kyntiew ïa ka ioh ka kot jong ki paidbah kiba pynmih ia ki tiar shna hi ki ban long kum ka lad kamai ïa ki ban kyntiew ïaka ioh ka kot jong ki bad yn ïaleh ruh katba lah ban pyniaid ïew ia ki tiar ha Shillong bad ha ki jaka jngohkai pyrthei kiba don ha ki jaka bapher bapher hapoh ka jylla Meghalaya.
U Shiavh Awasthi u la ong ruh ba kane ka prokram ka dei kaba la ptreikam naduh ar ne lai snem mynshwa ha ka por ba u dang long kum u Director jong ka Meghalaya Skill Developmet Society bad ka dei ruh lyngba ka jingiohi jngai jong u myntri rangbah ka jylla, u Conrad sangma bad myn ha ki snem ba la leit yn pat shym la lah ban pyntreikam bha ha kaba ai jing kyrshan ïa ki briew bad ym pat shym la lah ban thaw kino kino ki jaka ne ki shlem ai jinghikai hynrei mynta ka tnat MSDS ka la ialeh ban thaw bun ki lad bad ki shlem ai jinghilai ha kiba bun ki jaka hapoh ka jylla ban kyntiew ïa ki paidbah ha ka lad iohkam ioh jam bad ha ka ioh ka kot.
Haba kren sha ki briew kiba wan shah hikai ha kane ka shlem ai jinghiklai u DC u la ong ba “ kane ka dei ka lad iohkam ioh jam abd ka lad kamai, ngim kwah ba phi shim ïa ki jinghikai kiba tang ar ne lai bnai hynrei dei ban shim ki jinghikai haduh ban da tbit ha kaba na ka liang ki bor district ruh kin ai ki jingkyrshan da ki machine thaiñ jaiñ ba phin lah ban trei na ïing bad lada dei ki jait machine kiba heh ngi lah ban buh da ki centre ban buh ïa ki machine , lada donkam ban plié da ki dukan ruh ngin iarap ban thaw ki lad ki lynti, ngi don ruh ka kynhun ha kaba iadei bad kaba ai jinghikai bad kaba ai jingsumar ïa ki briew kum ki nurse, ha kaba dang shen ka tnat MSDS dang dep phah ïa ka kynhun jong ki nurse sha ri Japan, kyrmen ba ki shlem ai jinghiakai kin wan shuh shuh ha East Jaiñtia Hills District”
Na ka liang u Skill Development Officer, u bah Lambormi Tariang, u la kyntu ïa kita kiba shah hikai ba ki dei ban long kiba ïaishah bad iaineh haduh ban dep namar kane kan long ka jingmyntoi ïa ki hi, u la ong ba ki don ruh ki jait kam kiba lada kwah ban trei sha bar ri ruh ki lah ban leit kum sha UK, Singapore bad kiwei kiwei ki ri bad kine ki dei kita ki Overseas Placement kiba long kiba tikna bha, u la kyntu ïa ki paidbah ba kin shim ïa kane ka lad ka kabu, u la onn ba ïa kane ka jaka ai jinghikai ha Ladrymbai ruh ka Ladrymbai Handlom Society ka tnat kan kyrshan radbah ban kyntiew ïa kane ka shlem ai jinghikai, u kyntu ba ki dei ban long kiba trei shitom ban pynwandur bha ïa ki jingthaiñ jaiñ jong ki khnang ba kito ki briew kiba na bar kiba kwah ban thied kin num thlia ïa ka dor hynrei kin shim beit ïa ki tiar.
“Ki bor district ruh hapoh ka jingialam u Deputy Commissioner ngin ialeh ban kyntiew katba lah ïa ki mar kiba pynmih napoh ka district, phi donbok ba phi ioh ïa une u DC namar dei une uba la sdang ïa kane ka prokram Skill Meghalaya uba la pynwandur ïa kane ka prokram naduh ka por ba u long kum u Director jong ka Skill Meghalaya, kyrmen ba ka East Jaiñtia Hills District kan kiew ha kane ka kam, mynta ngi plié ïa kane ka centre ha Ladrymbai bad da ka jingiatreilang bad ki Dorbar Shnong bad ka ophisu DC ngin sa nang wan plié shuh shuh sa kiwei kiwei ki shlem ai jinghikai ruh hapoh ka district ban kyntiew ïa ki paidbah bad ki ban long ruh kum ka sakhi ban pyni sha ka pyrthei ba ki briew jong ka East Jaiñtia Hills District kim dei baroh kiba im da kaba trei dewïong hynrei ki don ruh bun bha kiba tbit ha kiwei kiwei ki jait kam ruh ban kyntiew ia ka ioh ka kot.
Kiba la ai jingkren ki kynthup ruh u Secretary jong ka Society, u bah Reginald Khiangti, u Waheh Shnong Ladrymbai-B, u bah Jespar Bareh bad u Secretary Shnong, u bah Cherity Suja.
